Mynta ka sngi (31/05/2024) ka Jaiñtia National Council JNC – Western Zone ryngkat ka jingiasynran lang ki Nongialam ka CEC ka la leit hiar sha ka shnong Lapangap halor ka jingjia shah pyniap dusmon uwei u rangbah uba kyrteng u Ma Tellme Talang myn ha ka 29/05/2024
Naka liang ka seng kala leit ban ia sngewlem lang bad ka ïing u ba khlad bad la buh ruh ka jingduwai ba kin ioh ia ka jingpyntngen mynsiem khamtam na ki kti u Trai Kynrad na jrong.
Ka seng kala ioh ruh ban iakynduh ia u Waheh Shnong u ma Deimonmi Lyngdoh ban iakren ruh halor katei ka jingjia ba sngewsih bad ka seng kala hiar ruh sha ka jaka ba la lap ia ka met iap jong u ma Telme Talang lyngba ka jingsynran lang u Waheh Shnong bad la iathuh ruh ba katkum ki dak ki shin ym lah ban pdiang ba ioh dei ki briew kiba napoh ka Shnong hi ki ba donkti, hynrei la suba jur ba lah ban dei ki briew kiba nabar shnong, bad ha kajuh ka por ruh ka dei ka Shnong kaba Don ha khappud Assam.
Ka seng ka la leit ruh shapoh ka Nartiang Police station bad la iakynduh ruh bad ki ophisar bad la iathuh haka seng ba ka kam ka dang iaid shakhmat bad ym pat lah ruh ban iathuh eiei namar haduh mynta ym pat shym la tip mano ba donkti.
Naka liang u Vice President ka JNC Western Zone bah Hamehi Bamon u la pynrem jur ia kane ka jingshah pyniap ki briew khamtam ha kine ki jaka khappud namar ym dei tang kane hynrei la katno sien shuh ba ki paradoh parasnam ki jong ngi kin mat ia kum kine ki jait jingjia ba sngewsih, bad sa katno sien ruh kine ki jaka kin iai mat umkthang ba sngewsih.
Ka seng ka kyntu jur ruh iaka sorkar ba kadei ban leh wut wut ia kaba donkam bad ban kem ruh mardor ia ki ‘riew thrangsnam ki runar bad ban leh ruh da kaba tyngeh ym ban aili iano iano, namar ban shim iaka mynsiem khamtam ki pli ki duk ki suk kadei ka kam kaba poh tam, ong u Hamehi Bamon.
Ka seng ka pynpaw ruh ba haba kiwei ki jaidbynriew ki shah pyniap katno ka jingtrei shitom ki Pulit ban ioh kem wut wut ia kiba donkti bad ha kane ruh ka bynta ngi khmih lynti ba kajuh hi ka jingtrei shitom ngi kwah ban iohi na ki Pulit, namar ngim kwah shuh ban iohi ba ki briew jong ngi kin shah long langknia ha man la ki por khamtam ha ki jaka khappud bad ruh namar kadei ka jaka kaba lah ju don ka jingiakynad ha man la ki por bad kiwei pat ki jaidbynriew bad ka seng ka ngeitskhem ruh ba ki bor jong ka aiñ kin leh ia kaba donkam tam bad kaba dei eh khnang ba kato ka ïing ba mad ia ka jingsngewsih kan ioh iaka jingbishar kaba biang tam.
