Mynta ka sngi ka MDC jong ka Narpuh Constituency ka Kong Deiwi Tongper ka la leit iakynduh ia ki Incharge jong ka Ratacherra Infiltration Police Check Post na ka bynta ban kyntu ia ki ha ka ban peitngor ia ka jingwan rung ki barjylla kiba dei ki nongwan rung beaiñ kiba shah beh na Assam ha ka Eviction drive jong ka sorkar Assam.
Ka Kong Deiwi ka lah ioh ruh ban iakren bad u 2nd Incharge jong kane ka Check Post ban ia phylliew jingmut halor kumno ban iatreilang na ka bynta ban wanrah iaka jingshong shngaiñ ha ka jylla khamtam ba ha kane ka thaiñ ka don ha National Highway kaba pyniasoh ia ka jylla Assam bad Meghalaya.
Na ka liang ka Kong Tongper ka la kyntu jur ia ki ba trei hangne ba kin khmih bniah ia ki kot ki sla jong ki bar jylla kiba wan bad dei ruh ban pynphai biang ia ki bym don kot don sla ki ban pynshisha ba kidei ki nongshong shnong ka Ri India.
Na ka liang ka ophis ka lah iathuh ba ki la check lyngba ki EPIC, AADHAR bad Birth certificate na ka bynta ki khyllung ban pynshisha ba ki dei ki nongshong shnong ka Ri India.
