Hadien ba la mih ka hukum ‘Eviction Drive’ na ka sorkar Assam pyrshah ïa ki ‘kharbangla kiba shong ha Assam khlem ki kot ki sla ban pynshisha ba ki dei ki nong India, hynnin ka sngi na ka liang ki nongïalam jong ka VPP East Jaiñtia Hills ki la leit hiar khnang sha ka thaiñ Elaka Bri Sumer ban ïakynduh ïa u OC Incharge ka Moriap Outpost ryngkat bad ki Rangbah shnong ba Don ha ki thaiñ khappud Assam ban ïakren halor ka jingïoh lad ki kharbangla ban ïoh rung shapoh Meghalaya lyngba ka Wah Kupli kaba hap hapoh ka Sumer Elaka.
Ha kane ka sngi ki nongïalam ka VPP ki la ïoh ban phylliew jingmut ryngkat bad ki Waheh Shnong jong ki 6 tylli ki Shnong kumjuh bad u OC Incharge ka Mooriap na ka bynta ban wad ïa ki lad kumno ban ïada ïaka jingwanrung ki barjylla sha kane ka jylla lyngba ka Wah Kupli.
Kane ka jingleit ka VPP ka long shibynta ban kyntu ïa ki shnong khappud kumjuh ïa ki bor ba dei peit ba kin long husiar khnang ba kine ki ‘illegal immigrants’ kin ym ïoh lad ban rung sha ka jylla lyngba ki lynti bapher bapher kiba pynïasoh bad ka Assam.
Kumta na ka liang ki Waheh Shnong kumjuh u Incharge ka Mooriap ki la ai ka jingkular ba kin long kiba kloi ban ïatreilang na ka bynta ban peit pyrman halor kane na bynta ka shongsuk shongshngaiñ ka jylla.
