ka Khasi Student Union (KSU) lyngba ka kyrwoh na u Information & Public Secretary u Samla Pynshai Rani ha ka 28 tarik Naitung 2025 ka la hiar ban leit khynra ia ka ktem sah beaiñ ki mynder ha jan parking Paltan Bazar (Cantonment) kiba markhap bad ki shnong kum ka Mawbah bad Nongsohphoh Upper Mawprem. Ha kane ka jingleit khynra ka KSU ka la lap ba ki mynder kiba sah ha katei ka jaka kim don ki kot ki sla ba biang kum ki EPIC bad kiwei kiwei, bad ha ka jingkhynra na katei ka ktem la lap ruh ia ki jingdih pynbuaid kum u drok u kynja bad kiwei kiwei de.
Katei ka jaka ka long ruh kaba isait met katta katta. Ka jingjaboh bad jingsma kaba mih na katei ka jaka ka lah ban ktah ia ka koit ka khiah kiba bun balang. Ki ïing sah jong ki la long thik kum ki ïing ha slum ki shu ker malu mala da ki plywood bad synduk kot ka jaka kaba khim, khlem ki paiñkhna bad palat 50 ngut kiba sah ha kitei ka jaka, kynthup ki nongkhaïi drok, kynja, ki nong bylla beaiñ ba khlem kot khlem sla. Kumta ka seng ka la pynher krad syndon ia kine ki briew kiba sah beaiñ ha katei ka jaka bad phah lum shi syndon ia ki tiar ki tar jong ki bad beh mardor na katei ka jaka.
“Ka jingtlot bad ka jingbym don ka aiñ kaba paka ban khanglad ia ki poi wir kan buh jingma ia ka jaitbynriew rit paid jong ngi, namar lah shu ioh mon ban rung laitluid khlem don nongpeit nongjngoh ia kine ki briew ki dei kiba kumno bad ki wan naei? Hato ka Jylla jongngi khamtam ka Bri Hynniewtrep kadei ka jaka rieh tngen mo jong kiwei pat ki Jaitbynriew kiba la sakma hato yn shu pdiang mo ba kan shu kylla long ka jaka bret ia ki briew na kiwei pat ban shu wan shong thap ha ki shnong ki thaw ki jongngi” buh jingkylli ka Seng.
ka Sorkar Jylla ka dei ban kyndit bynriew shwa ba ka por kan dier, ban pyntrei kam noh ia ka ILP khnang ba ka umsaw jong ki mynder kan nym wan tyllep da kine ki ba wan shong wir wan shong thap, bad lada leh mynthi ka sorkar ka dei ban shim ia ki jingkitkhlieh lada jia kano kano ka jingjia haba iadei bad ka jingwan rung kyrthep ki mynder ri sha kane ka jylla.
“Sorkar jylla shano kita ki khyrdop talasi mynder bad haduh lano yn shim khia ia kane ka mat kaba ktah ia ka jaitbynriew?” kylli biang ka KSU.
