Ka KSU, East Jaiñtia Hills District Unit (EJHDU) ha ka jingsynran lang na ki dkhot ka KSU Narpuh Circle mynta ka sngi 25 July ki la ioh ban hiar kyrkieh sha Ratacherra Infiltration check gate ban peitngor ia ka jingrung jingmih ki mynder sha Ri lum Khasi, Jainitia.
Kane ka jingleit hiar mynta ka sngi ka dei halor ka jingiohi lyngba ki lad pathai khubor ba ka sorkar Assam ka la sdang ban khynra naphang ia ki poiwir Bangladesh ba sah beaiñ ha manla ki District jong ka jylla Assam.
“Na ka liang ka seng ngi sngewthuh ba kan ktah nongkong eh ia ka jylla Meghalaya namar ka don mar syndah bad ka Assam” pynpaw ki nongialam.
Kine kiba shah khynra ki hap ban phet, te shaei kin leit rieh, kin phai ka khmat sha Ri lum Khasi ba don ka dud ka ngap, bym don aiñ ban teh lakam, ka jylla ba ioh rung laitluid katba mon. Ka Ri lum Khasi Jaintia ka don ha ka jingma kaba khraw na ka jingwan buhai shnong ki mynder.
Ka KSU ka sngewkhia ruh ba ka sorkar jylla bad sorkar pdeng kim bna satia eiei ruh ban pyntreikam noh ia ka Inner Line Permit (ILP), haba katne ka sohsat ka Ri Khasi na ki poiei shi sngi. Ka KSU kan iai trei bor bah, bad ka seng kan ym shongthait ban ialeh ban im na ka bynta ka jingshngaiñ jong ka jaidbynriew.
