-Ai jingiaroh ba ka Meghalaya ka dei ka bneng ha ka jingitynnad ka Mei Mariang-
Kum shibynta ban pyntip halor u Khasi na ka liang ka Khasi Hills Autonomous District Council (KHADC) ha ka 3 tarik Nailur 2024 ka la khot ia u Lat ka Jylla u CH Vijayashankar ban leit jngoh kai ia ka Heritage Village bad ia ka LawKyntang ka ba don ha Mawphlang.
Hakane ka sngi ha ryngkat u Lat ka Jylla, la don ruh u CEM ka KHADC u Bah Pyniaid sing Syiem, u Deputy CEM u Bah Pynshngain N Syiem, u nongialam ka liang pyrshah hapoh Council u Bah Titosstarwell Chyne, u Chairman u Bah Lamphrang Blah, u Deputy Chairman u Bah Charles Marngar, ki heh Ophisar, u Syiem ka Hima Mawphlang, ki Rangbah shnong, ki senglongkmie bad kiwei kiwei.
Haba kren ha kane ka sngi u Lat ka Jylla u la pynpaw ia ka jingkmen ban ioh ban wan iuhkjat ha kane ka jaka da ka ba ai ruh ka jingiaroh ia ka riti ka dustur kaba kyrpang kaba u Khasi u don.
U Lat ka Jylla u la kdew ruh ba ka Meghalaya ka dei ka bneng ha kaba iadei bad jingitynnad ka mariang.
Na ka liang u CEM u la iathuh ba kane ka jingleit jngoh u Lat ka Jylla ka long kum shibynta ban pyntip khambha halor ka riti dustur, ka tynrai jong ki jaitbynriew Khasi bad namar ba ka Mawphlang ka kynthup ia ka Heritage Village kaba don ki jingtei bapher bapher ki ba long kum ki jingsahnam na ka bynta ki Hima Khasi.
“Ngi la ioh ban pynsngew ha u Lat halor ki jingdon ki jingtei sahnam u khasi ha kane ka jaka, ka jaka shad u Khasi, ka museum bad halor ka Monolithic Festival kaba ka Council ka ju pynlong shisien ha ka shisnem” u la ong.
U la bynrap ruh “Ngi la pyntip ruh ia ka jingdon ka LawKyntang kaba long kyrpang naduh hyndai hynthai kumba 700 snem, ka ba haduh mynta ka don ka adong kaba ki briew ki lah ban rung ban peit ia ka jingitynnad kane ka khlaw hynrei kim dei ban rah eiei na kane ka khlaw”.
