Yn phah pynkhuid katkum ki kyndon aiñ: MS
Ka Meghalaya State Pollution Control Board (MSPCB), Shillong ha ryngkat ki bor ka Jowai Municipal Board, mynta ka sngi Balang kila hiar ban leit jurip dalade hi halor ka jingbret pathar ïa ki Thyrnia (Injection) bad ki tyndong lum snam kiba la dep pyndonkam, ha ki bynta u surok Jowai-Dawki NH-40 (E) hajan ka Wah Myntdu haneng ka Jaka Jwai, ka jaka ba dang hap hapoh u pud u sam jong ka Dorbar Shnong Mynthong, Jowai.
Ki nongtrei ka MSPCB kila lap ba kala don shisha kane ka jingbret pathar ïa kitei ki Thyrnia Injection bad ki tyndong lum snam bala dep pyndonkam da ka Passah Diagnostic Center kaba don ha Mission Compound Jowai.
U Member Secretary ka MSPCB Dr G.H. Chyrmang (MFS) haka jingkren sha ki lad pathai khubor ula ong hadien ba la ïoh jingtip ïa kane ka jingbret pathar ïa ki ‘Bio Medical Waste’ lane ki tiar kiba mih na ki Lab Diagnostic, kila shim khia mardor ïa kane ka kam da kaba leit hiar ha kane jaka ban jurip ïa ka jingshisha.
Ula ïathuh la dep ban bthah ïa kiba donkti ha kaba bret ïa kitei ki tiar ba kin leit pynkhuid noh ïa ki katkum ki kyndon ka Bio Medical Wastena, na ka ling ka Pasah Diagnosis kila kular ban leit pynkhuid hakhmat ki briew ka MSPCB bad ka Magistrate.
La lap ruh ba ka Passah Diagnostic Center kaba don ha Mission Compound Jowai ka bym shem la don ïa ki kot ki sla kiba biang bad ka long kaba lyngngoh “Kumno ka ïoh ban thied ïa kitei ki tiar ba pyndonkam ban lum snam, ïa kane yn sa tohkit bniah bad pynshitom katkum ki kyndon aiñ”, ong u MS
Halor kane ka ula pyntip lada lap ba kane ka Passah Diagnostic Center kala ïaid lait ïa kane ka kam, yn leit khang noh shi syndon bad kin hap ban siew ïa ka kuna (Fine) katkum ka Environment Protection Act bad ka Bio Medical Waste.
Ula kyntu ïa kino kino ki Diagnostic Center kiba bret pathar ïa kum kine ki jait tiar ki lah ban shah pynshitom lane shah pynsangeh noh shi syndon.
Ha kane ka sngi la ïadonlang ka Chief Executive Officer (CEO) jong ka JMB kong R.V. Lyngdoh (MCS), u Waheh Shnong ka Dorbar Shnong Mynthong ma Lamphrang Pohktai bad ki ophisar na ka tnad ka koit ka khiah.
Na ka liang ki bor jong ka shnong Mynthong kila buh ka jingmana kum kine ki jingleh pathar kim bit shuh ban jia nangne shakhmat. La kyntu ruh ïa kino kino ki briew kiba ïaid lynti na une u surok kim dei ban bret pathar ïa kino kino ki jaboh jabaiñ kat shaba lap.
