U symbud Myntri Rangbah ka jylla Meghalaya, ma Sniawbhalang Dhar, ha ka 19 tarik July 2024 u
la hiar dalade sha ka shnong Moopliang, West Jaiñtia Hills District, na ka bynta ban leit jngoh bad ban ia kynduh ia ki nongialam bad ki paid riew ngeit jong ka Balang Presbytarian Moopliang ban ai mynsiem bad sngewlem ia ki ha ka jingiadei bad ka jingduh noh jong ki ia ka ïingmane na ka daw jong ka jingpluh ding kaba la jia ha ka 22 tarik May 2024.
Ha kane ka sngi, la pdiang sngewbha ia u ma Sniawbhalang, da ki nongialam, ki nongsharai bad ki riewngeit jong ka Balang ki ba kynthup ia u pastor, ki tymmen basan, ki rangbah balang bad kiwei de ki
nongialam jong ka Balang.
Hadien ba lah dep jurip ia ka jinglong jingman jong ka jaka ba don ka ïing mane ba la julor, u symbud myntri rangbah u la shong iasyllok bad ki nongialam jong ka Balang ban ia pyrkhat lang kumno ban tei biang ia kane ka ïing kyntang ba ki khun jong ka Balang kin ioh biang ban ainguh aidem ia u Trai Kynrad nongbuh nongthaw kumba ju long.
Ia ka jingialang ba lyngkot, la pyniaid da u Tbn W. Rymbai, u ba la pynpaw ka jingsngewnguh bakhraw ia u symbud myntri rangbah u ba dei ruh u MLA jong ka thaiñ, ba u la kloi ban wan peit da la ki jong ki khmat ia ka ïing mane jong ki ka ba la iing noh. U Waheh shnong ka shnong Moopliang u ma Pyrkhat Sna ha ka jingai jingkren, u la iaroh ia ka jingkitkhia bad jingkloi jong u MLA ban wan ai mynsiem ia kane ka jingjia ia ka Balang Presbytarian Moopliang bad kane ka pynpaw ia ka jingdon jingkitkhlieh jong u kum u nongialam jong ka thaiñ.
U symbud Myntri Rangbah ha ka jingkren jong u, u la panmap na ki riewngeit ka Balang ba
u klem lah ban wan ha kito ki sngi ba dang shu ïng ka iing mane namar ba u leit donkam shabar Ri
ha kito ki sngi. U la pynpaw ka jingsngewsih halor ka jing ing noh kane ka ïing mane bad u
sngewthuh ruh haduh katno ki paid riew ngeit ka Balang ki pang ka mynsiem ha ba ki ia kynduh
kum kane ka jingjia. U la pynkymmaw ia ki khun ka Balang, ba kim dei ban duh jingkyrmen hynrei
ban shaniah bad aiti ha u Blei trai kynrad ha ba ki mad kum kine ki jingeh namar u kynrad u tip ka
ei kaba bha tam na ka bynta jong ki.
U la pynkynmaw ruh ia ka khana jong u Job, u ba dei uwei na ki shakri jong u Blei bad ban
shim nuksa na u. Namar, kum ki ba ngeit, ngi dei ban pdiang ia ki jingtynjuh bad ban ainguh ia u
Blei lada dei ha ki jingkmen lane ha ki jingshem jynjar. U la kyrpad ruh ia ki khun ka Balang ba kin
long ki ba ia ieid, ki ba sbun bad ki ba ia tylli khang ba kin lah ban shna bad pynieng biang kham
kloi ia kane ka ïing mane.
Kum ka dak ka jingiasnoh kti lang bad ka balang, u symbud myntri rangbah u la iathuh ba u lah dep kular ban synniang 25 lak tyngka ha ka jingiadei bad ka jingshna thymmai ia kane ka iing mane ha ka jingwan ud jong ki nongialam jong ka balang ha kine ki bnai ba la dep. U la kular ruh ban dangwad shuh shuh ki lad ki lynti ban iarap kumno ban pyndep kloi ia ka jingtei ia kane ka ïing mane khnang ba ki khun ka Balang kin ioh ban pyndonkam kham kloi ia kane ka jaka shakri Blei. Ha shwa ban pynkut ia kane ka jingialang ba lyngkot la ioh ia ka jingduwai da u Pastor P. Thubru.
