U symbud Myntri Rangbah ka jylla Meghalaya, u bah Sniawbhalang Dhar, ha ka 3 tarik August 2024 u la hiar sha ka shnong Khanduli ka shong kaba don ha khappud bad ka jylla Assam ban ia kynduh bad ki nongialam jong kane ka shnong halor ki ba bun ki mat ba ka shnong ka ia kynduh naduh ka shong suk shong shngaiñ, ka roi ka par bad kiwei de ki jingeh ba ki ia kynduh. Ha kane ka sngi, u symbud Myntri Rangbah u la jurip ruh ia ka School Khanduli Secondary School ka ba la seng bad pyniaid da ka Durbar Shnong Khanduli ha ryngkat ka jingiadon lang jong ki nonghikai jong kane ka school, ki dkhot ka SMC bad ki nongialam shong.
La ioh ruh ban plie ia ka Fate jong ka Dorbar Shnong Khanduli, kaba ki thmu ban pynmih pisa kyrpang na ka bynta ka Khanduli Secondary School kaba la kyntiew kyrdan naduh u snem 2015 sha ka secondary school.
Iaka jingialang ba lyngkot la pyniaid da u bah K Bina, Asst Waheh Schong Khanduli, la ioh jingkren pdiang burom na u Tbn K.S Langshiang bad ka jingkren maitphang na u bah Yoshida Nongspung Waheh Shnong Khanduli, u ba la pynpaw ia ka jingsngewnguh ia u MLA ka thaiñ u bym juh iehnoh ia ka shong ha man ki jingeh ba ki ia kynduh.
Kiwei de ki rangbah ki ba ai jingkren ki kynthup ia u Ma C. Daw Dolloi Elaka Nogjngi, u Ma Lieh Sungoh na Mynsngat , ma Mutshwa Thabah Waheh shnong Sohphoh. La ioh ruh ban pynsngew ia ki jingeh ba ka school ka ia kynduh, naduh ki building, lynti iaid kjat bad khamtam ka tulop jong ki nonghikai. Lyngba ka memorandum ba la pule da i nonghikai jong ka skul, la pynsngew ba ka jingsiew tulop ia ki nonghikai ka la kot sha duh ka 4,44,000/- tyngka ha ka shisnem.
U kongsan, ha ka jingai jingkren u la ai khublei kyrpang ia ki riew rangbah jong ka shong Khanduli bad ia ka jingiohi jngai jong ki ban seng ia kane ka shlem ai jinghikai hapoh ka shong ka thaw ka ban long ka jingmyntoi pateng la pateng ia ka shong ka thaw. U la pynpaw ba, um ju klet ia kane ka shul bad la bunsein u la iarap, naduh ka building bad kiwei de ki jingdonkam. U la kyntu ia baroh ki nongshong shnong ba ki dei ban kam trai ia kane ka skul bad ba ki dei ban kyrshan lang ia ki nongialam bad nongpyniaid jong ka skul.
U la sneng ia ki kynnah skul ba ki dei ban trei shitom bad kim dei ban buh jingthmu ban pule tang ban ioh kam sorkar, hynrei ki dei ban pyntbit ialade ha ki kam ba ki kwah ban trei namar don bun ki lad ki lynti ban trei ban ktah ynda ki la don ka jingnang jingstad ba biang. U la kular ruh ban kyrshan lang ia ka skul kumba 5 lak tyngka, ban iarap lem ia ki jingdonkam jong kane ka skul ha ki ba bun ki bynta.
Ia ki kyntien ai khublei la ioh na u bah C.M Nongrum, Secretary Shnong Khanduli bad la pynphuh pynphieng ia kane ka sngi da ki jingshad bad jingrwai na ki khynnah skul ka Khanduli Secondary School.
