-Pyrshah ka NEHUSU ïa ka jingthmu ban pynlong EC ha Delhi-
Ka North Eastern Hill University Student Union (NEHUSU) ha ryngkat ka jingsynran bad ka KSU NEHU Unit hynne ka sngi ka 10 Naiwieng 2025 ka la pynlong da ka jingiakhih pyrshah ia ka jingthmu ban pynlong ia ka EC ha ka Nongbah Delhi ha ka jingialam jong u Prof. P.S. Shukla, u Vice-Chancellor ka NEHU.
Ban pynpaw ia ka jingpyrshah halor katei ka jingthmu, ka NEHUSU hapoh ka jingialam jong u Samla Melamlynti Markhap (NEHUSU President) bad u Samla Martin Warjri (General Secretary NEHUSU) ka la phah da ka shithi sha u Dharmendra Pradhan, Union Minister of Education (Government of India) da kaba kdew ba katei ka jingpynlong EC shabar jong ka Skulbah NEHU ka dei tang ka jingpynlut ksan. Ha kajuh ka por, la pynkynmaw ruh ia u Myntri ba u Shukla watla um pat hiar shuki na ka kam, ka Skulbah kam ithuh shuh ia u kum u VC ka NEHU namar la dep ban dawa ba un iehnoh kam la jan shi snem pura bad u khlem don shuh ha kane ka jylla naduh ba la pynbor ba un hiar shuki.
Ha katei ka jingiakhih, la sakhi ia ka jingmih ryntih jong ki Samla Pule ha ryngkat ki Plakad kiba la pyni ia ka jingpyrshah halor ka Meeting ba la khot da u Shukla.
