Ka Trekking Adventure Enthusiasts Dkhiah West kaba la seng naduh u snem 2017 da ka jingthmu ban pynkhie im biang ia por ksiar jong u mynbarim, sa shisien mynta ka sngi 23/03/2024 ka la ioh ban pynlong biang ia ka 5th Trekathon kaba la sdang na ka shnong Dkhiah West, East Jaiñtia Hills District bad iaid kjat ter ter shaduh u Mot sahnam jong u Woh Kiang Nangbah uba dei u khlawait ka ri Pnar ha Jowai, West Jaiñtia Hills District, halor ka phang “U boodien ia ki luti warim wajah wa mkam u sumar. Ia ka bei mariang wa i I’m i emkam u sumar sukher ia ka”.
Ha kane ka jingiaid kjat la wan ban iashim bynta naduh ki khynnah, ki samla, ki rangbah shynrang bad kynthei, kynthup ia ki longkmie longkpa, ki Doctor, ki Nurse, ki Engineer, ki Nonghikai bad kiwe kiwei de kiba la wan na ki shnong bapher bapher kum na ka shnong Wapung, Iongkaluh, Ladrymbai bad kiwei de.
Kane ka jingiaid kjat kala pynhun shisha ia ka mynsiem jong kito baroh, namar ba kila lah ban iohi ne sakhi da la ki jong ki khmat ia ki dienjat jong ki ’riew hyndai ha ki por mymbarim, ia ki lynti leit iew lei hat jong ki, shaduh sha Iawmusiang, Iawkhylla kaba ki ju iaid da ka kjat.
Ha kane ka jingiaid kjat jong kane ka kynhun kila ioh ban sakhi ia ka jingdon jong ki ‘Moo Siang luti’ kiba dei ki Maw siang lynti, ki Maw Pynïeng, ki Maw Kilometer kiba pyni ia ka jingjngai jong ka jaka, kiba dang neh dang sah haduh kine ki sngi ba mynta.
Ha shwa ban sdang ia ka jingiaid kjat la don ka jingialang ba lyngkot ha Community Hall jong ka shnong Dkhiah West, ha kaba la ioh ia ka jingkren lamkhmat da u Dr. R. Phawa. La ioh ia ka jingkren sneng kren kraw bad ka jingduwai na u ma Tyrshain Phawa. La ioh ia ka jingkren shaphang u Kiang Nangbah da ka Miss. Percia Phawa kaba dei ka nonghikai jong ka Jaintia Eastern College.
Haba la poi pat ha ka jaka ba don u Mot Kiang Nangbah la pynlong ia ka jingiabam ja sngewbha ha madan Madiah Kmai Blai kaba don ha Syntu Ksiar ha ruh jong ka Wah Myntdu.
Napdeng ki nongiashim bynta ba dang khynnah eh i dei i Niwa Dan ba dang 6 snem tam ka rta bad la don kiwei de ki khynnah kiba dang hapoh 10 snem ka rta.
