Ka Warjaintia Students’ Union (WJSU) Central Body Amlarem kala aiti da ka jingthoh ha u MP ka Lok Sabha u Dr Ricky A.J Syngkon bad un ïarap ban buddien da kaba pynsngew shaduh ki myntri bad ka tnad treikam jong ka sorkar kmie, ha kaba ïadei bad ki hynriew tylli ki mat ba donkam jong ka thaiñ War Jaintia.
Kaba nyngkong ka seng kala dawa ïa ka rukom pyntrei ïa ka surok National Highway No-206 na Dawki haduh Amlarem lyngba ka National Highway Authority of India. Namar katkum ka projek ban shna ïa kane ka surok kala kot haduh 43 klur, hynrei ka jingpyntrei kam ïahap bad kiba bun ki bynta jong ka surok kiba julor lut.
Kaba ar ka seng kala pynsngew halor ka jingpynslem ban shna ïa ka Eklavya Model Residential School kaba don Amladkur Civil Sub-Division, halor kane ka seng ka dawa ban buddien ïa kane ka kam bad ka Ministry of Tribal Affairs, jong ka sorkar kmie naduh ka rukom pynshna (construction) bad ka rukom pynïaid ïa ka skul, da kaba ong ka jingïoh ïa kane ka skul kan da long ka jingmyntoi kaba khraw ïa ki paid ka thaiñ War Jaiñtia.
Ka seng ha ka mat ba lai kala dawa ban pynbha ïa ka rukom treikam jong ka Dawki Land Customs Station Transit Point kaba don ha Muktapur da ka jingïatreilang bad ki bor ka shnong Muktapur, khnang ban ïaidbeit ka jingshalan ïa u mawshun na Syndai-Trangblang bad Bataw-Lakadong sha ri Bangladesh.
Kaba saw ka seng kala pynsngew ha kaba ïadei bad ka jingbym pyntrei kam ïa Residential School kaba don ha shnong Pdengshakap, Amlarem Civil Sub-Division, ka seng ka dawa na u MP ban buddien ïa kane ka kam khnang ban sdang noh ïa ki lad jinghikai ha katei ka skul kaba la dep ban shna.
Kaba san ka seng kala kyntu ïa u MP ba un tuklar ïa ka rukom pynïaid ïa ka Dawki Land Port khnang baka kamai kajih kan long kaba ïaid beit ïaid ryntih, namar kumba long mynta katei ka Dawki Land Port kala shim ïaka bai shalan haka dor kaba 1000+ kawei ka trok kit mar hashwa ban rung sha Bangladesh. Kane kala long kaba palat ïa ka dor ba la buh da ka sorkar, ka seng kala kynnoh ruh ka jingshim ïa kane ka dor kan pynïoh nong ïa ki nongpynïaid kaba kot sha ka 1000+ klur ha ka shi snem kum ka (Black Money).
Kaba khadduh ka seng kala kyntu ban pyntrei noh ïa ka Leshka Stage II Hydro Power Project, namar ka jingdawa ïa ka bording mynta kala long kaba donkam eh ïa ka thaiñ baroh kawei bad kan long ka jingmyntoi ha kiba bun ki liang na ka jingwan katei ka projek.
Na ka liang ka seng WJSU ka kyrmen skhem ba u MP jong ka jylla un shimkhia ia kine ki jingdawa kiba donkam eh jong ka thaiñ War Jaiñtia bad kan long ruh ka jingmyntoi ia kiba bun ba lang, pynkut ka kyrwoh na u President ka WJSU Central Body Amlarem bah Syndai Swer bad u General Secretary bah Everest Langstang.