Ki bor pyniaid District jong ki ar tylli ki District kata na West Jaiñtia Hills (Meghalaya) bad na West Karbi Anglong District (Assam) mynta ka sngi kila pynlong ïa ka jingïalang pynïasuk hapeng ki ar jaitbynriew ki pait Pnar bad ki Karbi kaba la pynlong ha BOP jong ka Assam kaba don ha ka shnong Khanduli WJHD.
Kane ka jingïakynduh biang hapdeng kine ki ar jaitbynriew ha ka sien kaba ar ka long hadien ba ki paid Karbi kim lah ban shim ïa ka rai ha ka jingïalang ba nyngkong kaba la long ha ka 16 tarik mynta hi u bnai.
Hadien jong kane ka jingïalang pynïasuk na ka liang u ma Pyrkhat Pyrphet uwei na ki dkhot jong kane ka Committee ula pynsngew ha ka jingïakren kila shim ïa kawei ka rai ba kin ap ïa ka ‘Official Letter’ na ka Karbi Anglong Autonomous Council (KAAC) ban pynthikna bala weng noh ïa ka jaka lum khajna (Tax Gate) kaba don ha Khanduli. Ki don ruh ka jingkyrmen skhem ha ka jingïalang kaba bud kin sa ïoh ka jubab bala weng ïa katei ka jaka lum khajna, kaba long ka daw bah jong ka kane ka jingiakynad hapdeng kine ki ar jait bynriew.
Halor kane ula pyntip ba kin sa ïa kynduh ïa ki MDC jong ka Jaiñtia Hills Autonomous District Council (JHADC) na ka bynta ban ïakren bad ki bor ka Karbi Anglong Autonomous Council (KAAC) bad ban weng kloi ïa katei ka khyrdop lum Khajna.
Ula ong ba ka daw hi ba mih ka jingïa huri hura bad ka jingïakynad hapdeng kine ki ar jaitbynriew ka dei naduh ba la wan buh ïa katei ka Tax Gate ba la kam ba ka dang dei ka jaka kaba hap hapoh ka Shnong Khanduli. Ula ong ynda la weng ïa Katei ka jaka lum khajna la tikna ba ka jingshong suk shong shngaiñ kan wan biang kumba long ha ki por mynshwa.
Ha kane ka sngi la ïadonlang naduh u Districts Assistant Commissioner bah W. K Kharbuli, MCS, DSP (L/O) A. J Sangma, Namdong C& RD Block, BDO ma B. Sungoh na West Jaiñtia Hills, u Assistant Commissioner and Border Magistrate Rakesh Thakur bad u Circle Inspector Z. Baithanglangdi na West Karbi Anglong, Hamren, ki nongïalam shnong ka Khanduli bad kumjuh na Karbi.
