Ka Jaiñtia National Council (JNC)-Western Zone hapoh ka jingialam u President ka Zone bah Hamehi Bamon ka la ioh ban iakynduh markhmat bad u DMHO ka West Jaiñtia Hills u Dr. Dhar haka jingiadei bad ka tnad jong ka koit ka khiah hapoh ka District.
Hakane ka jingiakynduh u President ka Zone la ioh ban iakren hakiba bun ki mat kum ka MCH Jowai (Civil barim) ban pynbun iaki jaka thiah pang namar haka jingshem jong ka seng ka dang biang ban pynbun iaki jaka thiah khamtam iaki nongkha khun.
Ka seng kala iakren ruh iaka bynta u nongleh post mortem ha Civil hospital, Ialong namar badon tang uwei bad kane ka wanrah ka jingtlot haka kam bad bun naki paidbah ki juh ud iakane, ka seng daka jingsngewkhia kala kyrpad ia u DMHO ban leh iakaba donkam eh naka bynta ban pynsuk ia u Paidbah.
Ka seng kala pynsngew ruh hakaba iadei bad ka jingduna ki nongniah kali (driver) ki PHC/CHC badei ban pynbun noh iaki driver khnang ban pynsuk iaka leit ka wan jong ki nongtrei kumjuh ki nongpang.
Shuh shuh ka seng kala banjur ruh hakaba iadei bad ki ambulance bad ka jingleh mynleh jong ki nongtrei ambulance, ka seng ka la juh ioh bunsien ki jingujor iaka jingleh sting ki ambulance khamtam haka por ba donkam dakaba shu ai daw ba la sniew ki ambulance, ka seng ka buh hakhmat eh ia kane ka bynta bad la kylli ruh na u DMHO balei la shu iohsngew iakata ka jingsniew ki ambulance ha man la ka por, bad la kyntu jur ban leh iakaba donkam eh.
U President jong ka zone u la ioh ruh ban iakren haka liang ka jingduna ki dawai dashin haki PHC/ CHC kum ki injection ter ter baki paidbah ki hap ban leit sha kiwei pat ki jaka ban thied. Kumjuh ruh ka jingbym biang ki kor pynmih bording kum ki generator haka por ba lip light.
Ka seng ka pynsgew ruh iaka jingeh jong ka PHC Pdengshakap Amlarem Block hakaba iadei bad ka jingjot ki kamra thiah pang ba ladei ka por ban pynshna noh lym kumta kan ktah lut ia kane ka jaka ai jingsumar bad kan sa wanrah ka jingeh bakhraw ia u Paidbah.
Khatduh ka seng ka buh jingkyrpad ha khmat u DMHO ryngkat ka jingthoh ban wanrah noh daka centre naka bynta ki nongthoh exam nurse ha Ri lum Jaiñtia ban pynsuk iaki nongialeh exam kiba nangne ka Ri lum khamtam haka liang ka leit ka wan, bad ngi ngeitbskhem ruh lyngba ka jingdon kine ki centre kum jong ka NEET kan long ka jingkyrkhu bah, ong u Hamehi Bamon President ka Zone.
Naka Liang u DMHO Dr. Dhar u la kular hakhmat ka seng ba un sa shimkhia iakine ki mat bad un sa leh ruh ia kaba donkam tam ban wanrah ka jingshakri kaba bha tam naka bynta u Paidbah. Ka seng kan sa buddien biang halor kitei ki bynta naka por shaka por naka bynta ka bha ka miat bad ka koit ka khiah jong u paidbah.