Ka Jaiñtia National Council (JNC) mynta ka sngi ba ar 02.07.2024, kala ioh ban iakynduh markhmat bad u Executive Engineer (EE) ka MEPDCL Khliehriat Division halor ka jingduh bor ding elektrik kaba la kot sha ki ar taiew tam haka shnong Sutnga khamtam ka dong Wailong.
Ka seng hapoh ka jingialam u Information Secretary CEC bah Mebanteilang Sukhlaiñ ryngkat u President ka Khliehriat Circle bah Shanborlang Bamon haba iakren bad u EE ka Khliehriat Division u la iathuh ba ka dawbah ka jinglip jong ka light kadei ka jingsniew jong u Transformer uba don haka dong Wailong, bad ula ong ruh ba naka jingther palat u slap bad ka lyer ka la ktah shuh shuh ia une u Transformer.
Naka liang ka seng haba pan jingshai ba yn pynshna ne bujli pat da uwei, u EE u la iathuh badei ban bujli noh da uwei bad ula ong ruh ba na ka liang jong ka tnat ka MEPDCL Khliehriat Division kala dep ban leh ia kaba donkam kata ban phah wut wut ka report sha ki bor kiba halor badei ban ai noh da u transformer uba thymmai khnang ban ioh leh ia kaba donkam eh hynrei haduh mynta ym pat ioh iaka jubab.
Shuh shuh u EE ula iathuh ba naka liang jong u, u lah dep ruh ban phah ka jingthoh sha ka office u Chief Executive Engineer naduh kine ki taiew ba lah dep ha kaba iadei ban ioh da uwei pat u transformer ba thymmai hynrei haduh mynta ka kam ka dang sahteng ym tip na kaei ka daw.
Naka liang jong ka seng ka buh ka jingkyntu kaba jur iaka sorkar bad iaki bor kiba halor kiba dei peit ia kane ka kam ba kin sngewbha ban kitkhia bad ban leh ruh ia kaba donkam, bad ym dei ban shu ai daw da kumne da kumtai namar ka seng ka shait iohsngew bha iaka jingong kaba ong “haka por lyiur jur u slap bad haka por tlang duna ka Um” hynrei ka jingsiew pat kam ju don jingmap.
Kum ban shu pynkynmaw baka dong Wailong haka shnong Sutnga kadei ka dong kaba don iaka jaka ai jingsumar kaba heh kata ka CHC bad kaba ai ruh ka jingshakri ym tang iaka shnong Sutnga hynrei iaki phew tylli ki shnong kiba hap sha kito ki thaiñ. Te lada kane ka jaka ai jingsumar ka shong dum da ki taiew bad ki bnai te katno shah kan ktah iaka jingtreikam jong ka naka bynta ban ai ka jingshakri kaba paka khamtam iaka im ka iap jong u paidbah.
Ka seng kan nym lah ban pdiang ia kane bad kan sa buddien biang lada ka kam kam shym long satia kumba kadei ban long, khnang ban wanrah shisha iaka bit ka biang jong u paidbah bad ka jingshngain haka leit ka wan namar ha kine ki sngi kiba mynta ka jingduh iaka bording ka pynlong ka jingbym shngain bad ka pynthut ruh ha baroh ki liang.