Ka Jaiñtia National Council (Western Zone), kaba la ïalam da u President Jong ka u Hamehi Bamon ryngkat u General Secretary U Sambormi Susngi bad kiwei kiwei ki dkhot, dang shen ki la ïakynduh ïa u IAS R. Chitturi uba dei u Mission Director jong ka National Health Mission (NHM) ha Meghalaya. Ha kane ka jingiakynduh, ka JNC ka la pynpaw ia ki mat kiba don hakhmat jong u bad la aiti ruh ia ka dorkhas kaba kyrpad ban pynkhlaiñ bad pynlong ryntih ia ki nongtrei kontrak kiba trei hapoh ka NHM sha ki nongtrei ba pura, khamtam kito kiba la shakri palat 10 snem.
Ka seng ka la kyrpad ruh ban ai ka juh ka jingsiew iaka juh ka jingtrei (equal pay for equal work) ia kitei ki nongtrei kontrak, da kaba kynthoh ba namar ba ki trei ia kajuh ka kam kum ki nongtrei ba pura, ka jingsiew jong ki ka dei ban long kumjuh.
U R. Chitturi ula pynpaw bad sngewdei iaka jingdawa ka seng bad ula pyntikna ruh ban rah ia kane ka kam sha ka sorkar pdeng. U la ban jur ia ka jingkyrshan jong u ia ka nongrim jong ka jingsiew kaba mar katjuh na ka bynta ka kam kaba mar katjuh bad u la sngewnguh ia ka jinglong babha ba la pyni da ka JNC. U Chitturi u la pynshlur ruh iaka seng ban leit mih biang sha u lada ki jingeh ki mih haki sngi ban wan.
Nalor ka jingïakynduh ïa u Mission Director, ka JNC ka la ïakynduh ruh ïa u Myntri ka Koit ka Khiah ka Jylla Meghalaya, u Wailadmiki Shylla, ha kaba ki la pynpaw ïa ki jingeh bad ai ruh ïa kajuh ka dorkhas. U myntri haba iakynduh bad ka seng u la ong ba yn pyrshang ban pynthikna ba ki nongtrei kontrak kin ioh ia ka tulop kaba iaryngkat bad ki nongtrei ba pura. U la pynthikna shuh shuh ba ka sorkar kan ym ieh beiñ ia kito kiba la aiti bun snem hapoh ka jingshakri ka NHM bad lada ki kontrak jong kine ki nongtrei ka kut noh ha kane ka por, ka sorkar kan wad ki lad ki lynti na ka bynta jong ki katkum ka jingdonkam ong u myntri ka koit ka khiah ka Meghalaya.
