Ka seng ka JSU Sengkmie mynta ka sngi ka la ioh ban ia kynduh ia u Myntri Rangbah ka jylla u Conrad K Sangma bad ia u Symbud Myntri Rangbah ka jylla u Ma Snaiwbhalang Dhar ha ka sngi plie ia u stadium ha Wahiajer ha kaba ka seng ka la ioh ban aiti ia ka dorkhas halor ar tylli ki mat ban pynrung iaka thup jingrwai Jaintia hapoh ka Anthem bad ka jingpyrshah ba thmu ka sorkar ban wanrah ia ka Railway ha Ri Jaintia.
Ka seng ka la pynsngew sha u Myntri Rangbah bad sha u Symbud Myntri Rangbah ba ka Jaiñtia ka dei ban paw lang ha ka thup jong ka jingrwai State Anthem kat kum ka dorkhas la ong ba ka Jaiñtia National Durbar la thaw ia ka naduh u snem 1900 ban iakhun ban dawa Hill state ha kitei ki por bad ka la ong ruh ba iaka jylla la ioh na ka Assam ha u snem 1972 dei ba lah shim na ar tylli ki Distrik ka Assam ka United Khasi and Jaintia Hills bad ka Garo Hills.
Ka seng ka lah pynsngew ruh markhmat bad u CM ba iaka Railway ba ka sorkar da lei lei kam dei ban wan rah shapoh ri lum Jaiñtia namar ka ktah ia ka jingbuhai shnong ki mynder namar ia mynta ka jylla kam don aiñ kaba biang ban pyrkhing iaka jingrung kyrthep ki mynder ri bad ki nongialam ka seng ki la ong ia u CM badei ban wanrah shuwa ia ka aiñ ILP bad sa iapeit pat ban ioh pdiang ia ka railway hapoh ri lum Jaiñtia.
Na ka liang u CM u la kular ban shimkhia halor kane ka jingdawa ka seng bad un sa pynsngew lang sha ki para myntri hapoh ka cabinet jong u.