Ki bor pyniaid District jong ki ar Jylla kata ka East Jaiñtia Hills, Meghalaya bad ka Cachar District, Assam mynta ka sngi ki la pynlong ka jingiakynduh lang (Inter- State Meeting) ha ophis treikam jong u Deputy Commissioner ka East Jaiñtia Hills District ha nongbah Khliehriat.
Ia u DC Rohan Kumar Jha, IAS bad SP Numal Mahatta, APS jong ka Cachar District la pdiang burom da u DC bad SP ka East Jaiñtia Hills u Abhilas Baranwal, IAS bad u Giri Prasad, IPS.
Kane ka jingiakynduh jong kine ki ar tylli ki bor pyniaid District ka long shi bynta na ka jingpynkhreh ia ka jingiaid beit iaid ryntih ka Elekshon MP sha ka ïing Dorbar Lok Sabha ka ban sa long shen. Nalor kane la iakren ruh shibun ki wei pat ki mat kiba iadei bad ka shongsuk shongshngaiñ ha ki bynta khappud (inter state border) jong ka Meghalaya bad Assam kiba hap hapoh u pud jong kitei ki ar tylli ki District.
