Ki nonghikai Adhoc kiba hikai ha ki LP, UP, Secondary bad Higher Secondary School kiba don hapoh ka lama jong ka Federation of All School Teacher of Meghalaya (FASTOM) na Ri Lum Jaintia, mynta ki la pynlong ia ka jingiakynduh lang kaba la pynlong ha phyllaw jong ka Community Hall ka Dorbar Shnong Tympang Club Iawmusuiang Jowai, shi bynta ban pynkhreh ia ka Rally bah jong kane ka seng, ka ban long ha nongbah Shillong ha kane ka 22.04.2022.
Ia ka jingialang mynta ka sngi la pyniaid da u bah Sunborn Jungai Organising Secretary FASTOM. La ioh ia ki jingkren na u bah E.G War Publicity Secretary, kong Diviana Syiem Joint Secretary FASTOM bad u bah Mayborn Lyngdoh Spoke Person FASTOM.
Ka kong D. Syiem haba kren ka la ong ba ngi la dep ban pynlong ia ki rally ha kine ki sngi ba la dep ha ka ban dawa ia ka hok jong ngi, hynrei ngi la shah pynsangeh ha ki bor sorkar bad la shah ia ngi ban iashim bynta tang khyndiat ngut, ha kaba na ka liang jong ngi ruh kum ki nonghikai ngi pyni ia ka jingkohnguh bad ka burom ka jong ngi.
Na ka liang u bah Mayborn Lyngdoh u la ong ruh ba kane ka jingialang mynta ka sngi ka long na ka bynta ka jingpynkhreh na ka bynta ka rally ka ban long ha Shillong, u la ong ba la kyntu jur ia ki nonghikai ne kino kino ban leit sha katei ka rally ki dei ban leit da kaba don ka akor burom, ym dei ban kren ki ktien sih ktien sang kumjuh ym dei ban wan sha katei ka rally da kaba dih buaid. U la ong ba ha kane ka jingialang la dep ban batai lut ia ki nonghkai kumno kin wan sha katei ka rally kum ki nonghikai. Ha kane ka jingialang mynta ka sngi ki nonghikai ka FASTOM jong ka West bad East Jaintia ki la rai ba ha ka 22 tarik mynta u bnai kin mih paidbah sha katei ka rally bah na ka bynta ban dawa na ka sorkar ia ki jingdonkam jong ki.
