Ka Seng Kynthei jong ka Seiñraij Jowai ka ‘Women’s Welfare Organisation’ (WWO) mynta ka sngi kala pynlong ïa ka prokram ïakynduh lang ki khun Khythei, ha ïing Dorbar Hall Seiñraij Jowai ha kane ka juh ka sngi la pynkup burom kumjuh ïaki khun samla kiba la wan shakhmat ha ka jingpule bapher bapher kiba kynthup ha ka kyrdan Ph.D.
U ma Lahkmen Rymbui uba dei ruh u Adviser ka sorkar jylla ula long kum u kongsan, ha ka jingdonlang u President ka Seiñraij ma H. Toi, ma H.K. Lato, ki nongkitkam ka WWO Seiñraij Jowai, ki khun samla nalor kiwei de.
Ka jingthmu bam pynlong ïa kane ka prokram ïakynduh lang ka long shi bynta ban ai mynsiem shuh shuh ïa i khun Kynthei ka Seiñraij Jowai ba kin mih shakhmat ha ki kam bapher bapher, naduh ka pule puthi, ka jingshim bynta lang ha ka imlang ka sahlang bad haka synshar ka khadar.
U kongsan ha ka jingkren ula ai mynsiem ïa kane ka seng kynthei WWO ïa kaba la seng naduh ka snem 1987 ba kan dang ïaid shakhmat ha ki kam ba bha jong ka ban kyntiew ïa ka imlang ka sahlang ha baroh ki liang.
Katkum ka jingïaid jong ka por u ma Lahkmen ula kyntu lang ïa baroh naduh ki samla pule, ki kmie ki kpa ba kin ïaid katkum ka jingkylla jong ka por, namar kumba long mynta kino kino ki jingïakhun ïa ki exam ki hap ban ïaid katkum ki kyndon exam ba la pynkreh da ka sorkor wat haduh ki jingïakhun ïa ki kam sorkar kumjuh.
La pynphuh pynphieng shuh shuh ïa kane ka sngi da ki jingrwai bad ki jingshad na ki khun samla ka Seiñraij Jowai.
