Mynta ka sngi ki nongdie dohkha ha Nongbah Jowai, kila pynpaw ka jingsngewdiaw hadien ba ka tnat sorkar ba dei peit ia ki jingbam jingdih ka la pynmih ia ka hukum ban khang shwa haduh 15 sngi ei ei ban pynpoi ne ban thied ia ki dohkha na shabar jylla, hadien ba la lap ia ka jingkhleh ia ka kynja dawai (Formalin) ha ki dohkha kiba wan nabar jylla, ha kaba ka sorkar kala buh ruh ka jingmaham kaba tyngeh ba lada don kino kino kiba leh pyrshah ia kane ka hukum kin shah pynshitom da kaba sha set phatok 7 snem kynthih ryngkat ka kuna kaba 10 lak tyngka.
Ha ka jingiakren u nongaikhubor bad ki nongdie dohkha ha Iawmusiang Jowai, kila iathuh ia mynta ka sngi ki dang ioh ban die ia ki dohkha kiba wan naduh mynnin ka sngi, hynrei naduh mynta ka sngi la shah khang ban pynpoi ia ki dohkha na bar jylla khamtam na Andhra Pradesh kim ioh dohkha shuh ban die naduh lashai ter ter.
Kumta ki la pynpaw ka jingeh kaba khraw namar baroh shi katta ki im ja na kane ka kam kaba ki trei mynsngi bad bam mynmiet, sa kawei pat ki ong ba mynta ka dei ka por ba ki wad ia ki jaka pule puthi ia ki khun ki kti jong ki, kiba dang shu dep pass matrik bad kiwei de ki eksam bapher bapher.
Shuh shuh ki la ong ruh ba lada ngi shu shaniah dohkha tang napoh ka jylla kata ka long ka bym lah ban long da lei lei ruh namar hapoh ka jylla jong ngi ym pat lah ban pynmih ia ki dohkha haduh ban da dap bam ne katkum ka jingdonkam jong ki briew hapoh ka jylla.
Kumta na ka liang jong ki, ki la ong ba kumba long mynta ngim tip shu kaei ba ngi leh hynrei ngi shu shaniah ha ka jingstad jong ka sorkar ba kan wad ki lad ki lynti da kumwei pat khnang ba kane ka jingtrei jingkamai ka jong ki kan ym thut.
