U Chief Minister Conrad K Sangma ha ka sngi Nongkong ula hiar sha Mawsynram Block jong ka East Khasi Hills District na ka bynta ban leit jngoh ia kito ki lanot bad ban ai jingiarap ia ki longïing kiba la duh noh ia kiba haïing ha sem jong ki na ka jingshah lynshop ha ki bor mariang, khamtam na ka jingther jur jong u slap.
Ha kane ka sngi la synrang lang ia u CM da u MLA ka Mawsynram bah Himalaya Shangpliang, u MDC ka thaiñ bah Alwin Sawkmie, ka DC ka East Khasi Hills kong I. Laloo IAS nalor kiwei de ki sahep sorkar.
Na ka liang jongu Chief Minister ula pynpaw ia ka jingsngewlem sha baroh kitei ki longïing.
Ha ka jingleit jurip kaba ha Dangar bad Kenmynsaw ha kaba 7 ngut ki briew kila duhei ia la ka jingim kaba kynthup ia ki 4 ngut ki khynnah.
Ha Mawpen u CM ula ia kynduh ia ki dkot jong ka longïing jong u Sanborlang Marak uba la duh noh ia ka lok bad ki 4 ngut ki khun jong u. Na ka liang jong u CM ula aiti ia ka shithi iarap pisa kaba T.20 lak tyngka ha i kmie jong i (L) Kyllity Langpen iba dei i lok jong u Sanborlang Marak uba dang don ha ka jingthiah pang mynta ha jaka sumar ha nongbah Shillong.
Ha Dangar u CM ula iohlad ban ia kren bad ki nongshong shnong ha kaba ula pyntip ia ki ba ka jingpynioh bor ding elektrik bad ki network mobile ha kine ki jaka yn pynioh kloi da ka jingshim khia jong ka sorkar.
Ula pynpaw ruh ba ka sorkar kala shim khia ban pynbha biang ia ki lynti syngkieng kiba la julor, khnang ba ka leit ka wan jong ki paidbah kan long kaba suk. U la ong ruh ba ka sorkar kala mang pisa na ka bynta ban shna kloi ia ka jingkieng kaba don ha Kasimara.
Ha Kenmynsaw u CM ula ioh ban ia kynduh ia ki 3 ngut ki khynnah rit kiba la lait im, katba kila duh noh iala ki kmie ki kpa jong ki na ka daw jong ka jingshah ban khyndew. Ula pynpaw ka jingsngewlem ia kine ki dkhot ka longïing bad ula aiti ruh ia ka shithi pynioh jingiarap sha kiba haïing jong ki.
