U myntri rangbah ka jylla Meghalaya u Conrad Sangma, u la leit ban ïakynduh kyrpang ïa u myntri kam pohïing ka Ri, u Amit Shah ha New Delhi ha ka sngi Palei (Thursday) ban ïakren halor ki mat kiba kongsan kiba ktah ïa ka jylla.
Ha kane ka jingïakynduh, ki jingïakren ki la long halor ki saw tylli ki mat ba kongsan, kiba kynthup, kaba nyngkong ka long, ka jingthmu ban thaw da ka ‘Cadre’ kaba kyrpang na ka bynta ka jylla Meghalaya, namar kumba long mynta ka don hapoh ka ‘Joint Cadre’ bad ka jylla Assam, ban ïarap ban wanrah ka jinglaitluid ha ka liang synshar bad ka rukom trei kam.
Kaba ar ka long ka jingdawa ban kynthup ïa ka ktien Khasi bad Garo hapoh ka 8th Schedule jong ka Riti Synshar ka India, kaba long ka sienjam ban ithuh bad ban pynneh pynsah ïa ki ktien tynrai jong ka jylla.
Kaba lai ka long ka jingpyntrei kam ïa ka Inner Line Permit (ILP) hapoh ka jylla Meghalaya, ban ïada bad pynneh ia ka jinglongtynrai bad ka jinglong kyrpang jong ki paidbah ka jylla bad kaba saw ka long ka jingkyrpad ban ai kyrteng ïa ka surok ha New Delhi da ka kyrteng jong u (L) Purno Agitok Sangma, kum ka dak burom ïa uwei na ki nongïalam ba khraw ka ri India.
U Myntri Rangbah u la pynpaw ruh ïa ka jingsngewnguh jong u ïa u myntri kam pohïing ka Ri, halor ka jingkyrshan bad ka jingïarap jong u halor kine ki mat kiba la ïakren.
