U Returning Officer (RO) jong ka 1St Shillong (ST) Parliamentary Constituency u SC Sadhu mynta ka sngi ula pynlong ka jingiakynduh lang bad ki nongialam jong ki Party bapher bapher na ka bynta ban pynlong ia ka jingiasyllok ha kaba iadei bad ka elekshon Lok Sabha 2024 ka ban la long shen ha ka 19 tarik mynta u bnai hapoh ka Jylla Meghalaya.
Na ka liang jong u Sadhu haba kren ha kane ka jingialang ula buh ka jingkynru ia baroh ki nongialam Party ba kin sngewbha ban pynneh pynsah ia ka shong suk shong shngaiñ na ka bynta kane ke General Election Lok Sabha. Ula ong ba ka jylla Meghalaya ka dei ka jylla kaba lait na kino kino ki kynrum kynram ha ba don kino kino ki kam elekshon.
Ula kyntu ia ki nongialam Party ba kin kyrpad ia ki nongkyrshan jong ki ban pynneh ia ka shong suk shongshngaiñ, ha kaba kim dei ban wan rah kino kino ki jingiakulmar ha ki jaka ba pynlong ia ki jingialap elekshon paidbah jong kiwei pat ki Party. Ula kyntu ruh ia ki ba kim dei ban pynsaphriang ia kino kino ki khubor lamler khlem da pynshong nongrim shwa ia ki.
U Sadhu u kyrmen ba kane ka elekshong Lok Sabha ka ban sa long shen kan long kaba iaid beit iaid ryntih khlem kino kino ki jingwit jingthut. U ong ba baroh ki iatip ba ka jylla Meghalaya ka long ka jylla kaba shongsuk, kumta u kyntu ban bat ia kane ka kyrdan kaba ka jylla kala don.
