Ka All Jaiñtia Muster Roll Workers & Labour Union, Central Executive Committee (CEC), Jowai ha ka 10 tarik mynta u bnai kala pynlong ïa ka ‘6th Annual General Meeting’ ha Madan Jrisaleiñ, Jowai kaba kynthup naduh ki nongtrei Muster Roll ha ki tnad sorkar bapher bapaher, ki nongshet Mid Day Meal, ki Misteri bad baroh ki nongbylla sngi kiba don hapoh ka East bad West Jaiñtia Hills District.
ïa ka AJMW&LU la seng naduh ka 17th August, 2018 kaba la ïaid lynti mynta la lai snem khynthih hapoh ka jingïalam jong u President ma Khroo. L Pariat, kane ka seng ka ïeng ha ka nongrim ban dawa ïa ka hok jong baroh ki nongtrei bylla ba kim dei ban duh ïa ka hok longbriew manbriew kaba ki dei hok ban ïoh.
Ka jingdon jong kane ka seng ka long kum ka lad jingïarap ïa ki nongtrei bylla sngi kiba kynduh jingeh khamtam ha ki kam ki jam jong ki naduh ka bai nong sngi katkum ka dor ba la dawa na ka sorkar jylla ha kine ki snem ba la dep bad ban nym pynsah slem ïa ka bainong kaba kila dep trei.
Ha kane ka sngi da ki spah ngut ki nongbylla sngi na kylleng ki jaka jong ka East bad West Jaiñtia kiba don hapoh ka lama jong ka AJMW&LU kila wan sha kane ka jingïalang, kaba long ruh shibynta na ka lad ban ïa kynduh lang para nongtrei bylla sngi, ban ïa phylliew jingmut lang na ka bynta ki jingeh.
Kum ka dak ban ai mynsiem la pynkup burom kumjuh ïa ki nongïalam ka seng kiba la trei shitom met ba mynsiem ban pynïaid beit pynïaid ryntih ïa ki kam ba bha ka seng, la ai sngewbha kumjuh ïa ki nongthoh khubor da ki (Houseplant) bad la sam ruh ïa ki khusnam sha ki khun jong kitei ki nongbylla sngi kiba la wan shakhmat ha ki exam bapher bapher, la pynshong shit ïa kane ka jingïalang da ki jingïalehkai drama ba la shim bynta na ka Khleihriat Block, ki jingrwai na ka Shangpung Unit bad ki jingshad na ka Barato Unit kumjuh na kiwei de.
Ïa ka jingïalang la pynïaid da ka kong Banaras Dhar General Secretary (Khliehriat Block) bad la ïoh ruh ïa ki kyntien ai mynsiem na u President ka seng u ma K.L. Parait ula ong ba kane sngi 10 tarik u Nohprah ka dei ka ‘Human Right Day’ kaba la dap 70 snem mynta ban rakhe ïa ka hok longbriew manbriew.
Ha ka juh ka por ula ai ka jngïaroh ïa ki myntri sorkar jong ka jylla naduh u Myntri Rangbah, u symbud Myntri Rangbah, ki ophisar jong ka Tnad Labour bad kiwei de kiba la leh bha halor ka jingpynkiew ïa ka bai nong ki nongbylla sngi (MR) ha ka 1 tarik October 2018 bad ka long kum ka dak jong ka jingsah kynmaw burom.
Na ka liang ka sorkar jylla ha kine ki snem jong ka jingkhot pakhang shnong ka la ai jingïarap kumjuh sha baroh ki nongtrei ‘Mid Day Meal Cooks’ kaba long 1 hajar shi bnai na ka bynta u snem 2020 bad 2021. Ka AJMW&LU mynta ka sngi kala ïoh ruh ban pynsngew ïa ka report treikam jong ka seng kumjuh ruh ïa ki jingkheiñ jingdiah baroh.