Ka Anti-Narcotics Task Force, Meghalaya, mynta ka sngi ka la pynlong ia ka jingialang, hapoh ka jingpyniaid jong u Myntri Rangbah ka jylla, u Conrad K. Sangma, ban iakren ia ka Road Map ban rat dyngkhong ia u drok ha ka jylla. Ha kane ka jingialang la donlang ruh u symbut Myntri Rangbah ka jylla, u Bah Prestone Tynsong myntri ka tnad ka koit ka khiah, u Dr. Ampareen Lyngdoh, Myntri ka tnad pule puthi u Rakkam Sangma, u Myntri ka tnad imlang sahlang u Bah Paul Lyngdoh bad u DG, Meghalaya, Idashisha Nongrang nalor ki heh ophisar na ka ka sorkar jylla bad kiwei kiwei.
Ha kane ka jingialang la iakren bniah ia ka ‘Three Pronged Approach’ da ki bor jong ka aiñ, ka tnad pulit, ka jingpynduna ia ka jingma da ka tnad ka koit ka khiah bad ka Social Security da ka tnad Social Welfare. Ka jingialang ka la iakren ia ki jingkylla kiba la ktah ha ka jinglong, ki kam bad ki rukom treikam jong ka ANTF bad la iakren ruh halor ka buit treikam ba la tyrwa bad jingiarap kaba donkam na ki tnad bapher bapher kata ka tnad Aiñ, ka Koit ka Khiah, ka Pule Puthi bad ka Social Welfare.
Haba ai jingkren, u Myntri Rangbah ka Jylla, Conrad K. Sangma, u la ong ba donkam ban shim ïa ka rukom treikam kaba pura bad ong ba ka ANTF ka donkam ruh ban shong bad kawei pa kawei ka tnad ba dei peit bad ban trei halor ka jingpyntreikam ïa ka buit treikam ha ka rukom kaba ïaid katkum ki bynta bad ban don ka plan treikam ba la thmu ha ki plan ba lyngkot, ba pdeng bad ba jrong. “Ka jingtreikam jong ka ANTF ka long kaba heh bha kumta kan long kaba lah ban leh bad kaba don jingmut ban pyndonkam nyngkong ïa ki soh kiba rit bad pyntreikam ïa ka buit treikam kum ki projek pyrshang ha ki katto katne ki jaka ba jur bha ka jingma jong u drok ha ka Jylla,” u la ong.
Ha kane ka jingialang la iakren ruh halor ki jaka test, Detoxing bad Rehabilitation Centre bad ruh halor ki buit ban pynpra ia ka jingpynpoi ia ki dawai ha ka jylla.