Shi bynta ban ïakhun ia ka jingkhuid ka mariang bad ki wah, ka Sorkar Jylla ryngkat ka jingiatreilang bad ka Shillong Municipal Board (SMB) ki la pynlong ia ki program paidbah ia kaba la ai kyrteng “Ending Plastic Pollution” na ka bynta ban ai ia ka jingpynshai halor ka jingsniew ki plastik kaba la ktah ruh ia ka jingkhuid bad jingitynnad ka sawdong sawkun.
Katkum ka aiñ ba la pynmih ha u snem 2021 (plastic waste management), ka Sorkar Jylla ka la I donkam ban bteng biang ia kane ka aiñ da kaba ai hukum sha baroh ki Dorbar Shnong khamtam ha Ïewduh ba nangne shakhmat ym shah shuh ban pyndonkam plastik bad kita ki kynthup naduh ki plastik song mit mit, plastik ice cream, pliang bad pela plastik, ki song duma bad kiwei kiwei. La bthah ba dei ban pyndonkam noh da ki pla-kot, pla jaiñ, ki pele ba ka shna lyngba ki siej bad kiwei kiwei ki bym pynsniew ia ka mariang.
Haba sngap ia ka sur u Paidbah, khamtam ia ki nongshong Ïew, la don katto katne kiba la mynjur bad don ruh kiba la pynpaw ia ka jingshem jingeh bad ong ba ki pla-kot kim lah ban song shini, song mluh, song dud bad kiwei kiwei bad ong ruh ba kim lah ban song shibun namar kin pait tang katto katne minit. La don ruh kiba kynthoh ba kumno pat ia ki plastik jingbam, ki chips bad kiwei kiwei kiba wan nabar jylla. Nalor kata ki la ong ba lada ym lah ban khang shisyndon ia baroh ki jait jingbam kiba song da ki plastik, kane ka aiñ kan shu don ha suiñ.