Ka Environmental Public Hearing kaba la khot pynlong da ka Meghalaya State Pollution Control Board (MSPCB) mynta ka sngi 23.08.2024, ha Lumlakhi Wahsarang, Khliehriat C&RD Block, East Jaiñtia Hills District na ka bynta ka par dewiong kaba la tip kum ka Nehlang Lyngdoh Coal Block, ha ka jaka kaba heh haduh 100 hectare, kala long kaba iaid beit iaid ryntih.
Ha kane ka jingpynsngew paidbah ka MPCSB na ka bynta ban ioh ia ka jingtip na kiba bun ba lang la kyrshan ne pyrshah ia ka jingthmu ban tih ia u dewiong na ka tei ka jaka, la wan ban shim bynta da ki Waheh Shnong bapher bapher jong ka thaiñ East Jaiñtia, ki sengbhalang bad ki paidbah.
Ha kane ka jingpynsngew paidbah ka MPCSB, na ka liang jong kiba bun balang kiba la wan sha kane ka Public Hearing kila pynpaw ia ka jingkyrshan kaba pura ka jong ki ia kane ka jingthmu ban tih ia u dewiong lyngba ka juk mynta ne ka jingstad science. Kiba la pynpaw ba mynta la 10 snem la khang ban tih dewing ha kane ka thaiñ da ka NGT kata naduh u snem 2014, ka la wanrah shibun ka jingduh nong kaba khraw ia kane ka thaiñ ha baroh ki liang, ha kaba don ki khynnah kiba la hap ban pep skul bad kiwei de ki jingeh.
Kila ong ruh hadien ka jingshah khang tih dewiong ka la wanrah biang ka jingduhnong, kumta da ka jingwan sha khamt jong u samla Dapmian Shylla (Proprietor) na ka bynta ka Saryngkham A Coal Mine bad u Leborlang Lyngdoh na ka bynta kane ka Nehlang Lyngdoh Coal Mine bad lyngba ka jingkyrshan lang jong ki paidbah kan wan rah biang ka jingkylla ha kane ka thaiñ. Kumjuh ruh kila ong ba ka jingtih dewiong kaba da ka stad saian kam don jingma ia ki nongtrei bad kam ktah ruh ia ka mariang khamtam ia ki um ki wah bad ki khlaw ki btab.
Kiwei de kiba ai jingkren ki kyntup ia u ma Joinriwell Pyrtuh Ex-MDC JHADC, Bhalang Laloo Headman Wahsarang, Nicholas Rymbai na Molamonoh, Phone Tariang Headman Lumshyrmit, ma Justine Dkhar Ex MLA, Sambormi Lyngdoh Prsident JNC, ma Deibor Suchiang headman Ladrymbai Dongwah bad kiwei de. Na ka liang ki nongkren baroh ki la kyntu ruh ia ki bor ba dei peit ban pynioh noh kloi ia ka CTO, CTE sha u trai jong kane ka jaka khang ban ioh ban sdang noh ia ka jingtih dewiong lyngba ka juk thymmai.
Ia ka jingialang la pyniaid da u YFH Laloo Environmental Engineer MSPCB, ha ka jingiadonlang, u G.H Chyrmang Member Secretary MSPCB, u JF Lamurong Enviromental Engineer, DC, SP East Jaiñtia bad kiwei de.
Na ka liang ka MSPCB, ha ka jingiadei bad ka jingiada mariang ha kino kino ki Public Hearing kala pyndonkam da ki pela kot, ki pliang kot na ka bynta ka bam ka dih jong ki paidbah ym shuh da ki plastic kiba pynjaboh ia ka mariang bad ia kane kan leh ha baroh ki Public Hearing ki ba long hapoh ka Jylla.
