Iaid beit ka jingiakop khwai Dohkha ka JFEPA

-Wan ba nyngkong u Charemiki Passah bad u Owanker Paswet-

Ka jingiakop khwai Dohkha ne ka Fishing Competition kaba la pynlong da  ka Jaiñtia Fishing & Environment Protection Association (JFEPA), ha kane ka sngi saitjain 28.09.2024, ka la long kaba iaid beit iaid ryntih, ka seng lyngba ka mynsiem ba don ka jingiada ia ki doh um doh wah ka la pynlong ia kane ka Fishing Competition kaba la long ka sien kaba 31 mynta u snem. Ha kane ka jingiakop khwai dohkha bun ki rawon ki la wan ban iashim bynta ha kane ka jingiakop khwai dohkha.

            U Womlin Pakyntien u ba long uwei na ki dkhot jong ka Association, u la iathuh ia ka jingshah pynjot ki dohum dohwah ha ka wah Myntdu, ha kaba u la ong bun ki briew ba shim kabu ban pynduh jait ia ki dohum bad da ka jingdon jong ka Association kine ki nongshim kabu ki jah noh. Na ka liang jong u ma Pakyntein u la kyntu ruh ia ki samla ban pynrung ialade sha kane ka Association na ka bynta ban iadon kti lang ha ka ban iada ia ki donum doh wah.

            Ki nongjop ha kane ka jingiakop ki long kumne; Ha ka liang ki Dohkha Pnar iaka 1^st Prize la ioh rah da u Charemiki Passah, 2^nd Prize da u Silverstar Kyndiah bad ia ka 3^rd Prize da u Lambha Gatphoh. Ha ka liang ki Dohkha Dkhar ia ka 1^st Prize la ioh rah da u Owaker Paswet, ia ka 2^nd Prize da u Rang Challam bad ia ka 3^rd Prize la ioh da u Deimaya Shullai.

            Ia ki prize la sam da u President ka JFEPA ma D.H. Pde ryngkat ki dkhot ka JFEPA ha ka jingiadonlang kiwei de ki riew rangbah.