Ki nongniah kali kamai Tourist kiba hap hapoh ka lama jong ka All Jaintia Commercial Vehicle Association (AJCVA), ryngkat ka jingsnoh kti lang ki sengbhalang na ri lum Jaintia, Synjuk Waheh Shnong Jowai kumjuh kiba ha iing hasem jong ki nongniah kali kamai kiba la duh noh ia ka jingim jong ki hakti ki riew thrang snam, kiba kynthup ia u Fullmoon Kharsahnoh bad u Damehipaia Papeng.
Mynta ka sngi ki la pynlong da ka jingiaid paidbah kaba sdang naduh na Wah Gate najan Iewmusiang Jowai shaduh lad Kiang Nangbah Government College, Jowai, kum ka dak ban pynpaw ka jingpynrem jur ia kito ki riew runar ba la shim ia ka jingim jong kitei ki ar ngut ki nongniah kali.
Ha ka jingiadei bad katei ka jingjia, na ka liang ki pulit ki la ioh ban kem ia ki saw ngut ki runar kiba suba donkti ha kine ar tylli ki kam pyniap briew kiba kynthup ia u I Love You Talang uba dei ruh u boss ka kynhun, u Sampher Ksoo, u Tell-me Pyrtuh u bala tip ruh kum u Bormi, bad u Ramesh Dkhar, kiba don mynta ha kti jong ka aiñ.
Kum ban pynkymaw ba ia u Damehipay Papeng u ba na ka shnong Khongshnong uba shongkha ha shnong Mhmyntdu WJHD, u la jah rngai naduh ka 10.08.2022 bad la lap ia ka met iap jong u ha ka 24.08.2022, ha ki bynta jong u surok Jowai Bypass, katba ia u Fullmoon Kharsahnoh uba na ka shnong Larnai WJHD, uba kamai Jowai- Shillong uba la jah rngai ha ka 16.08.2022 ha kaba ia ka met iap jong u la lap ha ka juh ka sngi na Mynkre East Jaintia Hills District.
Ha kane ka rally la don ruh ka jingialang kaba la pyniaid da u President ka AJCVA u ma Paila Kordor Lyngkot, ha kaba na ka liang ki nongkren, ki la kyntu jur iaki bor jong ka aiñ ba dei ban pynshitom ia kine ki runar kat kum ka kam jong ki bad ym dei shuh ban ai janmin ne pyllait ia ki, hynrei dei ban rai pynrem ia ki shi syndon da kaba sdien phasi ne set along shi rta ka jingim jong ki, lym kumta kum kine ki jait jingjia ki nangjur shuh shuh hapoh kane ka thain bad ka ri. La ong ba lada don kino kino kiba haiing ha sem ne ki paralok jong ki, kiba donkti ban bah jamin ia ki, kine ruh ki dei kiba donkti ha kajuh kane ka kam runar, kumta kila dawa bad kyrpad jur ia ki bor sorkar ne ka aiñ bad a lei lei ruh ym dei shuh ban ai jamin ia ki.