Kum kadak ban pynpaw bad ban pynsngew sha ki tyndong shkor jong ka sorkar MDA ha kaba ia dei bad ka jingshah ieh khunswet jong u surok jong ka Elaka Sumer uba iaid lyngba ki 4 shnong kiba kynthup ia ka Pala, Kseh, Muknoor & Khahnar, na ka liang ka EJNC-Sumer Circle ryngkat bad ki 4 Shnong kumjuh ka Elaka Sumer da kawei ka sur kila pynlong da ka ‘Black Flag Peace Rally’ mynta ka sngi (15tarik une u bnai) ha Khliehriat, East Jaintia Hills District.
Hadien ka jingiaid Rally kala don ka jingialang paidbah, ha kaba ki nongkren kila pynrem jur ia ka jingleh bymsuid niew ka sorkar ia kine ki 4 shnong, ha kaba la ieh khunswet ia ka jinglong jingman jong u surok kaba la ktah shi katdei eh ia ki nongshong shnong. Kila buh ka jingkyntu kaba jur ia ka sorkar ba ka dei ban phai khmat noh sha une u surok khnang ba kan pynsuk ia ka leit ka wan jong ki nongshong shnong kane ka thaiñ.