Ki paidbah nongshong shnong jong ka Khanduli bad ki dkhot ka Jaintia Student Movement (JSM), mynta ka sngi kila pynlong syndon da ka jingiaid rally ryngkat ka rah lama, banner bad pyrta pynrem ia ki MDC khamtam ia u CEM JHADC kumjuh ruh ia ki bor District jong ka West Jaiñtia halor ka jingbym lah satia ka jong ki ban phah pynkynriah ia ka Entry Tax Gate ne ka jaka lum khajna kaba la buh da ka KAAC ha shnong Khanduli.
Ka jingiaid rally mynta ka la sdang na Police Poin Wahgate haduh ban da poi ha jan DC ophis ter ter haduh phyllaw jong ka ophis ka JHADC, ha kaba la pynlong syndon ia ka jingialang paidbah ha phyllaw kane ka ophis bad hadien la pynlong jingialang sa ha phyllaw jong ka ophis u DC WJHD.
Mynta ka sngi la ioh ia ki jingkren na u Waheh Shnong Khanduli u ma Yooshida Nongspung, President JSM WJHD samla Ribok Biam, Assistant Secretary JSM Kerbhami Dkhar, Vice President Skhembhalang Dkhar bad ki longkme longkpa na ka shnog Khanduli.
Haba kren baroh ki la pynpaw ka jingpynrem jur ia baroh ki MDC bad u CEM ka JHADC kumjuh ruh ia ki bor District kiba wat hadien ba na ka liang ka Dorbar shnong bad ki seng ki la dep ban pyntip lyngba ki jingtoh ia ki jingeh ki nongshong shnong ka Khanduli ha ka jingiadei bad ka jingdon katei ka gate lum khajna jong ki Karbi (Assam), hynrei haduh mynta kim shym la leh ei ei ha ka jingiadei bad katei ka gate kaba ladon ha katei ka jaka ba dang hap hapoh Jaintia la kumba lai bnai ei ei.
Namar ka jingdon katei ka gate ka la pynduh nong haduh 80 na ki 100 ki nongrep jong ka shnong, namar lyngba katei ka jaka ki nongrep ki shah khrong khajna ha man la ki por ba ki leit rep leit riang bad kit jingkit na ki jaka rep jaka riang jong ki.
Hadien kane na ka liang ki nongialam, shnong bad JSM ki la ioh ban ia kynduh ia u DC WJHD bad hadien ka jingiakynduh ki la iathuh ba u DC u la kular ban shim khia ia kane ka kam ha kaba kin ap hapoh shi taiew kaei ka jingmih la ka long kaba sei soh ne em bad lada kam long kaba sei soh ka jingiakhih kan bteng biang da kaba tyngeh.
