Ki samla pule jong ka skul bah NEHU bad kumjuh ha ka jingdon ryngkat lang ka Khasi Student Union NEHU unit mynta ka sngi ka 5 tarik Naiwieng 2024 ki la iaid rally da kaba sdang naduh library jong ka NEHU shaduh ka ophis jong u vice chancellor ka NEHU.
Ha kane ka sngi da ki spah ngut ki samla pule ki la ia mihshakhmat ban iashim bynta ha kane ka rally ban pyrshah jur bad dawa ban weng kam noh ia une u registrar jong ka NEHU.
Haba kren sha ki lad pathai khubor na ka liang u President jong ka NEHU Student Union u samla Sandy Sohtun u la ong ba dei u Vice Chancellor hi ba thung ia une u registrar bad mynta u pynslem ban weng bad une u Vice Chancellor um lah ban pyniaid ia kane ka university. Kumta ngi la pynbeit ban pynlong noh da ka strike ban dawa pynhiar shuki noh ia une u Vice Chancellor jong kane ka university bad kumjuh ban weng kam lut ia baroh ki ba shah thung beain ha une u vice chancellor.
Kumta na ka liang ka NEHU Student Union ki la rai ban iakhih da kaba shah jingit bad ban khang noh ia ka skul bah tad haduh ba ka sorkar pdeng kan sngap ia ka jingdawa jong kine ki samla pule.
Kumta ki la pyntip ruh ban khang khyrdep shwa ia ki klas baroh bad kumjuh ia ki department bapher bapher ba don ha NEHU namar ka rukom long klas ruh kam da tikna bha bad haduh da ioh da u vice chancellor ba thymmai yn sa plie biang.
Shuh shuh u la ong ba na ka liang ki samla pule ki la thait ban wan dawa na ka por sha ka por namar naduh ki por ba wan une u vice chancellor um shym la pyndep ia ki mat haba iadei bad ki jingeh jong ki khynnah pule na ka por sha ka por lada ngi pyni ia ki jingeh ruh ym lah ban pynbeit bad kam don jingmyntoi ka jingdon jong une u vice chancellor ba mynta.
