Ka Meghalaya State Olympic Association (MSOA) ka dang pynkhreh shait shait mynta na ka bynta ka jangiakob mareh kaba heh tam ha ka jylla ia kaba la tip kum ka “3rd Sohra International Half Marathon 2024” ka ban sa long ha ka 21 Nailur mynta u snem.
Shi bynta ban pynkhreh janai ia katei ka jingiakob, hynne ka sngi ka MSOA hapoh ka jingialam jong
u Bah John F.Kharshiiing (Working President), bad Bah Finely L.Pariat General Secretary) ki la leit ban jngoh ia ka jingbit jingbiang ia kaba la sdang naduh Laitsohpliah kaba dei ka jaka ka ban sdang ia ka jingïakob (starting point) haduh Mawsmai, ka jaka ba pynkut (finishing point) ha ryngkat ka jingsynran jong u SDO, ka tnad PWD, tnad Pulit, tnad ka koit ka khiah bad kiwei kiwei.
La don ruh ka jingsdang ban pynbha ia ka surok bad ka jingkhuid jingsuba. Ia ka jingialang na ka bynta katei ka kam, la pynlong ha ophis SDO Sohra.
Na ka liang ka MSOA ka la pynpaw ia ka jingkmen ba palat 7000 ngut ki la dep ban pynrung kyrteng (register) na ka bynta ban iashim bynta ha kane ka jingiakob.
La pyntip ruh ba ka jingsam ia ki sopti (shirt) kan long ha ka 18 tarik mynta u bnai naduh ka por 12 baje haduh 4 baje janmiet.
Na ka bynta kiba don jingmut ban ïashim bynta ha kane ka jingïakob ki lah ban pynrung kyrteng ïalade lyngba ka (online) website jong ka MSOA (https://meghalayaolympicassociation.com/marathon-run) lah ruh ban pynrung kyrteng lyngba ka offline, kata ha ka ophis jong ka MSOA ha JN Stadium & Sohra Shop hajan Petrol Pump, Lad Thanad.
Ka tarik khatduh na ka bynta ban phah ïa ki kyrteng ka long ha ka 10 Nailur 2024.
