Ka jingiathep vote na ka bynta ban jied ia ki 29 ngut ki Member of District Council (MDC) sha ka JHADC ka la sdang naduh ka por 7 baje mynstep mynta ka sngi bad ka jingiathep vote ka dang iaid shait shait, ha kaba ki nongthep vote kila ieng ha ki laiñ naduh ka por dangstep.
Ha kane ka kynti baroh ki kyrtong sha ka JHADC ki don 114 ngut, 107 ngut ki dei ki shynrang bad 7 ngut ki dei ki kynthei. Katba ki nongthep vote jong ka JHADC ki don 3,12,300 ngut. Na kine 1,51,079 ngut ki dei ki shynrang bad 1,61,220 ki dei ki kynthei, nalor kine la don iwei i Transgender ba don ia ka hok ban thep vote.
Na ka liang jong ki kyrtong na ki Constituency bapher bapher kila leit mih sha ki Polling Station bapher bapher kiba hap hapoh ka Constituency jong ki, ban ai mynsiem ia ki nongkyrshan jong ki, ha kajuh ka por ban peit ia ka jinglong jingman jong ka jingiathep vote ha ki Polling Station bapher bapher.
Na ka liang jong ki nongpyniaid Elekshon naduh ki Presiding Officer bad ki ophisar ba hapoh kila iatrei iala ka jong ka jong ka kamram ban pynlong ia ka jingiathep vote kaba iaid beit iaid ryntih bad kaba jop.
Haduh ba thoh ia ka khubor ym shem la ioh khubor ba don kano kano ka kynrum kynram kaba mih ha ki jaka thep vote bapher ha ri lum Jaiñtia.
Ha ka por mynstep la iohi ia u ma Saron Pasweth na ka INC bad u ma Iaibatlang Talang na ka VPP kiba la wan jngoh ia ka Polling Station kaba don ha ka shnong Khimusniang, Jowai. Kumjuh ia u ma Damian S War na ka UDP uba la pyndep ia ka jingthep vote jong u ha Namdong B.
