Ka jingpynlong ïa ka jingïalehkai Meghalaya Games kaba 6 kala long sa tang khyndiat sngi, kaba yn pdiang da ka West Jaiñtia Hills District, kumta ka jingpynkhreh na ka bynta ki jaka ïalehkai bapher bapher ka la ïaid shaid shaid ha kaba don kiba la jan dep bad don ruh kiba la dep.
Ki bor pynïaid jong ka West Jaiñtia Hills bad ki nongpynïaid ki dang pynthikna ba baroh ki jingdonkam ki long kiba la pynkhreh bha khnang ban pynlong ïa kane ka lympung kaba ïaid beit ïaid ryntih.
Ka Meghalaya Games kaba 6 kan kynthup ïa ki 29 tylli ki jait jingïalehkai ki ban long naduh ka 20 tarik haduh ka 25 tarik Kyllalyngkot, 2025, ha kaba ar tylli ki jingïalehkai kin long ha nongbah Shillong, ka Swimming ka ban sa pynlong ha Caroline Swimming Pool, Shillong bad ka Golf ha Assam Rifles Golf Course, Laitkor.
Ki jingïalehkai ba dang sah Archery, Arm Wrestling, Athletic, Badminton, BasketBall, Boxing, cycling, Football, Gymnastic, Judo, Karate-Do, Kho-Kho, Muay Thai, Shooting, Softball, Sports Climbing, Table Tennis, Taekwondo, Lawn Tennis, Volleyball, weightlifting, wrestling, wushu, ki jingïalehkai tynrai kum ka Rool Ball, Yogasana bad ka Lawn Bowling yn sa pynlong ha ki jaka bapher bapher jong ka nongbah Jowai, Wahiajer bad Khliehtryshi jong ka West Jaiñtia Hills District. Ha kaba baroh ki nongiashim bynta ki long palat ne duna 3899 ngut.
Ka jingplie pyrda ïa kane ka 6th Meghalaya Games yn pynlong ha ka 13 tarik Nailar, 2025 ha ka por 1:00 Pm ha District Library Auditorium, Mynthong, Jowai da u Myntri ka ka tnad ïalehkai u bah Shakliar Warjri kum u Kongsan, ha ka jingïadon lang u MLA ka thaiñ uba dei ruh u Chairman ka MUDA u ma Wailadmiki Shylla.
