Ka National Law School University Demand Committee, hadien ba la iohsngew ba ka sorkar kala don ka jingthmu ban buh 24 tylli ki National Law School Univesity ha man la kawei pa kawei ka jylla, kumta katto katne ki nongialam napoh Ri Lum Jaintia ruh ki la thaw ia kawei ka Committee kaba la tip kum ka National Law School University Demand Committee, kaba la lam khmat da ka Society for Study of Law, ha kaba kane ka Committee ha kane ka sngi Saitjain ka la pynlong ia ka jingialang paidbah ha shnong Khliehriat haka Auditorium jong ka Jaiñtia Eastern College.
Ia ka jingialang ha kane ka sngi la pyniaid da u ma R. Lamar uba long ruh u Chairman ka Committee bad ha kane ka jingialang kaba la wan ban ia donlang da ki dkhot jong ki sengbhalang bapher bapher kiba kynthup ia ka FKJGP, JSM, JSU, KSU, JYF., kumjuh ruh ka Synjuk ki Waheh Shnong East Jaintia Hills, ki dkhot jong ka Society for Study of Law bad kiwei. Ha ha kane ka sngi na ka liang ka Committee ka la iathuh ba ka la dep ban ia kynduh ia ki bor sorkar ba dei peit ia ka tnat pule puthi bad kumjuh ruh kin sa leit aiti ia kane ka jingiadawa ka jong ki sa sha u Lat ka Jylla.
U Principal ka Jaiñtia Eastern College u Dr. P. Nongtdu, haba kren, u la ong ba ka Ri Jaiñtia ka long shisha kaba la shah ibeiñ hapoh ka jylla haba ia nujor bad kiwei ki District ha ka jingiadei bad ka jingioh ia ki jingdonkam jong ki paidbah khamtam ha ka jingiadei bad ki jaka pule puthi. U ma Nongtdu u la ong ruh ba ka Ri lum Jaintia ka dei kaba riewspah ha ki mar mariang hynrei ki briew pat ki long kiba duk. U la ong ba lada ka sorkar kan buh ia ia kane ka jaka pule Law hapoh ka Rilum Jaintia kan ai jingmyntoi shibun ia ki samla kane ka thain, namar kum kine ki jaka pule jong ka sorkar ki long kiba duna ka jingsiew kumta ka pynioh lad ia ki khun ki kti jong kito ki longïing ki ba duna ka jingioh kamai ban leit pule ha kum kine ki jaka pule jong ka sorkar.
Na ka liang u samla Deihok Sumer Secretary FKJGP East Jaiñtia Hills, haba kren u la iaroh ia ka Society for Study of Law (SFSL), kaba la shim ia kane ka sien jam, ha kaban dawa na ka sorkar jong ka jylla Meghalaya ban buh ne wanrah ia kane ka jaka pule ha Ri Lum Jaiñtia, u la ai ruh ka jingiaroh ia ka JSM East Jaintia kaba la khot ban pynlong ia kane ka jingialang hapoh kane ka District East Jaintia, kaba la don ka thong ban iaid sha khmat haduh ban da ioh ia kane ka jingdawa kaba donkam na ka bynta ki khun samla ka thain.
Ha kane ka sngi la ruh ia ka jingkren na u ma u Damewanhi Rymbai, uba la khot bad kyntu jur ia baroh ki 7 ngut ki MLA bad ia ki 30 ngut ki MDC jong ka Ri Lum Jaintia ban kin wan sha khmat ha kaban snohkti lang ia kane ka jing dawa kaba donkam tam na ka bynta ka lawei jong ka Ri Lum Jaintia, namar da ka jingiadon ryngkat jong ki kum ki nong shynshar kan ai bor shuh shuh ia kane ka jingdawa. Nalor kine la ioh ruh ki jingkren na u ma S. Ryngkhlem dkhot ka KSU, samla Roitre Dkhar, Secretary JSM, ma K. Kso President ka Khliehriat Bar Association, ryngkat ka jingiadonlang kiwei de ki riew rangbah ka thain, ki khynnah skul, ki samla pule bad kiwei de.
