Ka jingleit ialap pynsngewthuh ia ki skhim bapher bapher jong ka sorkar kmie ia kaba la wanrah da u Myntri Rangbahduh ka ri India u Narendra Modi ia kaba la tip kum ka Viksit Bharat Sankalp Yatra, kala nangiaid shakhmat ha ki bynta bapher bapher jong ka jylla Meghalaya kumjuh ha ki bynta ka ri India.
Mynta ka sngi ia kane ka prokram la pynlong ha shnong Laitkynsew kaba hap hapoh ka Shella-Bholaganj C&RD Block, ha kaba ka dkhot ne ka Member jong ka National Commission for Women, New Delhi ka kong Delina Khongdup kala iadon lang.
Ka kong Khongdup kala ong ba kane ka Viksit Bharat Sankalp Yatra ne ka prokram pynsngewthuh paidbah ia ki skhim sorkar ka dei kaba la sdang da u Narendra Modi da ka jingthmu ban pynpoi ia ki skhim sorkar sha ki thaiñ Nongkyndong. Ha kine ki 9 snem ba la dep ka sorkar kmie kala trei shitom ban ioh I ba ki skhim sorkar ki dei ban poi sha kito ki briew kiba dei hok ban ioh ia ki la ong ka kong Khongdup. Kala pynkynmaw ruh ia baroh kiba la poi sha kane ka jingialang ba kin long ki briew kiba don ka jingburom ia ka mei mariang, ym dei tang ban thung ia ki dieng hynrei dei ruh ban kiar na ka jingpyndonkam ia ki plastic, “Lada ngi kwah ban iohi ia ki jingkylla ha ki shnong ki thaw bad ha ka ri jong ngi, ka dei ban sdang na lade” ong shuh shuh ka kong Khongdup.
La ioh ruh ka jingkren na ka kong Bethel Warjri kaba la pynpaw ka jingsngewnguh ia ka sorkar kaba la pynioh jingiarap ia ka SHG jong ka.
Kiwei de ki ba ai jingkren ki kyntup ia ka kong Theodora Wanjee kaba dei ka dkhot SHG bad ka kong Alda Marry Badwar ka nongpynmih dud kiba la pynpaw ka jingiaroh ia ka sorkar halor ka jingiarap kaba kila ioh ha la ki jong ki jong ki bynta ba ki trei.
