Ka jingpynpait ia ki EVM ha ki artylli ki Polling Station ha Wapung Skur kiba hap hapoh ka 22 -Musniang-Rangat MDC Constituency bad ki artylli ki Polling Booth ha shnong Bataw kaba hap hapoh ka 29- Bataw-Lakadong MDC Constituency kam long kaei kaei ka baphylla, hynrei kaba shait jia na kawei ka por sha kawei ka por hapoh ka Rilum Jaintia, ha ka Jylla lane hapoh ka ri India.
Ka jingiathep vote ban jied ia ki Nongmihkhmat sha ka Jaintia Hills Autonomous District Council kaba dei ban iathep hynnin ka sngi (21/02/2025), pynban ha ka jingmih ka kynrum kynram hapdeng ki para Nongthep vote kiba ia ieng hala ka liang ka liang ka la poi pynban shaduh u pud ban pynpait ia ki Electronic Voting Machines (EVM) ha ki artylli ki polling booth ha Wapung Skur bad artylli ha Bataw, la hap ban pynsangeh noh ia ka jingiathep vote ha kane ka 21/02/2025 bad la pynlong pat hynne ka sngi 22/02/2025 bad ka jingiathep vote ka long kaba iaidbeit iaid ryntih ha baroh kine ki 4 tylli ki Polling Station (Wapung Skur bad Bataw).
Kumban shu pynkynmaw ha kane ka jingpynpait ia ki EVM, ha kine ki artylli ki Polling Station jong ka Wapung Skur (Male & Famale) la mih ka huria hura, ban lait na ka jingiashoh iadat para nongthep vote, la iaphet kulmar ki Nongthep vote bad ha kane ka jingiaphet la don ruh kiba mynsaw malu mala kum u ma Satly Ryngkhlem, ma Perot Shadap, kong Jhanika Siangshai, kong R. Siangshai, kong Priamkor Dkhar, kong Recently Siangshai, kong Joyfully Lapasam, kong Torismona Siangshai bad kiwei de haba u Yutip u la wan ban jurib halor kane ka jingjia.
Haduh ba kut jong ka jingiathep vote, na ka jingdon ki voter 1899, ki shynrang ki don 921 vote kiba wan thep ki long 784 ngut, na ka vote jong ki kynthei kaba 978 kiba wan thep ki long 813 ngut.
Ha Bataw ka jingdon jong ki vote ka long 1337, ki shynrang 659 bad ki kynthei 678 ngut. Ka jingwan jong ki vote shynrang ka long 80.5 % bad ki kynthei ka long 77%.
(U ma Satly Ryngkhlem uwei na kiba mynsaw ha ka jingjia hynnin ka sngi ha Wapung Skur)