Ka JSU Jowai Circle mynta ka sngi hapoh ka jingialam u President u Borntifulson Rupon ki la iakynduh ia u DC ka WJHD ban iakren halor ki mat ba donkam.
Hadien ki jingjia aksiden ki ba la jia khah khah hajan Jowai Civil Hospital badon ha Ialong bad ha kiwei pat ki jaka ha Lad Woodland Hospital Sabahmuswang bad ha Lad Jowai Bypass ha kaba bunsien kala don ka jingduh ia ki mynsiem briew na kine ki jingjia.
Ha kaba iadei bad kane ka bynta ka seng ka la iakren bad u Khliehduh ka District halor kane ka bynta bad ka seng ka dawa ba dei ban buh noh da ki Speed Breakers, Divider Lanes bad ki Clear Road Signs ha kine ki jaka ba long ba don jingma (sensitive) khnang ban iada na kum kine ki jingjia ba sngewsih.
Na ka liang u DC u la kular bam shimkhia halor kane ka mat bad ka seng ka kyntu ia ka NHAI bad ka PWD Road Department ban leh ia kaba donkam khnang ba kan pynsuk ia ka leit ka wan u paidbah bad ban iada ia u paid babun balang.
