Ka KSU EJHDU hapoh ka jingialam u President Bah Streamly N Suchen bad General Secretary Bah KS Suchiang ha ka 27 tarik u Naitung 2024 ka la ioh ban iakren bad pynsngew ia ki katto katne ki mat ba ktah iaka East Jaiñtia hills district hi baroh kawei ha khmat ka Kong Santa Mary Shylla kaba dei ka local MLA ka thaiñ na ka 5- Sutnga Saipung Constituency ha ophis treikam jong ka ha Byndihati.
Ka seng ka la ai da ka dorkhas kum ka jingpynkynmaw bad ruh ka jingkyrpad ban iatreilang bad buddien ia ki mat ki jura kiba ka KSU EJHDU ka la shim ha kine ki snem ba la leit.
Ka seng ha katei ka sngi ka la ioh ban ia kren sani ia shibun ki mat naduh ka mat jong ka koit ka khiah ha kaba la pynsgew ba iaka civil hospital Khliehriat ka dang dei ban don iaka extension building bad ruh shibun ki jingdonkam katei ka shlem ai jingsumar, nalor ka civil hospital la pynsgew ruh iaki jingeh ba kynduh ha ki PHC bad CHC ha baroh ka thain bad dawa dei ban kyntiew bad thaw shuh shuh iaki sub centre bad ki health centre primary lane community katkum ka jingdonkam.
Ka seng ka la ioh ban iatai sani bha khamtam ha ba iadei bad ka jinglong jingman ka pule ka dangle ha ka thaiñ East Jaintia hills district hi baroh kawei ha kaba ka seng nyngkong eh ka la pynsgew ba la dei ban don noh ka Government Higher Secondary school ha ka district bad kane lyngba ka Rymbai Government Secondary school. Katkum ka jingioh jimgtip ka seng lyngba ka RTI, la lap ba ia katei ka jingthmu ka la don ka proposal ban kyntiew kyrdan sha ka Higher Secondary school bad ka seng ka la kyntu ia i Kong Santa ban buddien halor kane. Ka seng ruh ka la pynsgew halor ka jingshah ieh shrah ki artylli ki project kiba thmu ban buh Residential School bad ruh ka Block Institute of Teachers Education ki ba don ha ka shnong Umtyra. Halor kine ka seng ka la kyrpad ia ka Kong Santa Mary Shylla ban buddien bad ruh ban thaw ki lad ki lynti kumno ban pyndonkam iakitei ki building project na bynta ka jingbha u paidbah ka thaiñ. Ka mat kaba bud ruh la ioh ban iakren ka long ka jingdawa ban kyntiew kyrdan lane pynkylla noh shi syndon iaka Jaintia Eastern college sha ka full fledged Government aided college. Ka seng ka la i donkam ban pynkylla ia katei ka college sha ka Government College bad kaba don iaka hok ban ioh iakatei ka kyrdan. Ka seng halor kane ka buh daka proposal sha u myntri ba dei peit ha kine ki sngi ban wan.
Ka seng ka la ioh ruh ban pynsngew bad dawa halor u drok sha i nongmihkhmat ka thaiñ ba la dei ban don ia ka Rehabilitation centre ha district bad ruh ban wad ki lad ki lynti kumno ban pynioh ia ki jaka ban tei ia katei ka shlem sumar iaki samla ba kyrni ha u drok.
La ioh ruh ban pynsgew sa ka mat ha ka liang ka thung kam thung jam ha kaba ka seng ka lap ba 16 tylli ki post na ki 40 tylli lyngba ka RTI la set ban pyllait paidbah kaba iadei bad ka jingpynrung kam ha Ayush Hospital Rymbai. Kumjuh la ioh ban pynsngew ruh ba la dei ban don ia ka MOA hapdeng ka district administration bad ki cement plant bad ki samla kiba pass na ka ITI dei ban ioh placement nyngkong ha kine ki factory kiba don ha ka thaiñ East Jaintia hills district.
Bad ruh khatduh ka seng ka la pynsngew sha i Kong Santa halor ka mat BSF bad la ai jingmut ba la dei ban don noh da ka committee ba kyrpang halor kane ka mat hapdeng ki bor district ki paidbah ka thaiñ Narpuh bad ruh bad ki nongmihkhmat ban ia kren halor kumno ban wanrah ka jingsuk hapdeng ki BSF bad ki paidbah.
Ka seng ka kyrmen lyngba kine ki mat ba donkam yn lah ban pynurlong ia ki, na ka bynta ka bha ka miat ka district. Na ka liang ka Kong Santa ka la ong ka long kaba lakloi ban iatrei ryngkat na ka bynta ki mat ba bun hapoh ka constituency bad kumjuh hapoh ka district hi baroh kawei.
Ka seng ha kine ki taïew ban wan kan ia kynduh sa ia i Bah Kyrmen Shylla Local MLA 6-Khliehriat Constituency.