Ka jingther jong u lapbah lapsan ha kine ki sngi ba la dep ka la wan rah ïa ka jingtwa khyndew kaba shyrkhei bha ha ka 17 tarik u Jylliew, 2024 ha ka por kumba 2 baje shiteng mynstep. La sakhi da ka jingdon ki nongsah miet sha ki jaka bri shajan katei ka jingjia, la ong da kine ki nongtrei bri ba ka jingtwa khyndew ka long kaba jur bha kaba long thik kumba khynñiuh u jumai bah wat la ki sah kham pajih na ka jaka ba jia.
Ka jingpynjulor na kane ka jingtwa une u lum ka long shaba palat, kaba ym lah shuh ban batai ne ai ki jingkhein, ki dieng kwai da ki phew hajar tylli ki la khyllem bad shah ban haka khyndew nalor ki tympew, ki synsar bad kiwei ki marrep ym ïohi shuh ïa ka dur jong ki naka jingtuid khyndew bad shah ban.
Ka kyrteng ka jaka kaba kine ki nongrep ki thung ki tep ka long ka thaw ‘Sngam’ mut jaka ba sngem kaba hap hapoh ka jingpeit u Dolloi Elaka Satpator Marjan ka shnong Lumpyngngad bad ka shnong Kharkhana.
Ka jingshah ktah na kane ka jingtwa khyndew ka long haduh 8 tylli ki long ïing kita ki long ka kong Embhah Shylla, kong Damayanti Shylladong, kong Akordor Lamare, kong Niti Pamblang, kong Hiltimai Shylla, kong Silent Shylla, kong Nishain Khongmawloh, kine baroh 7 ngut na ka shnong Kharkhana bad kawei ka long ïing kaba kynthup lang hangne kaba hap haka juh ka apot ka long ka kong Miyo Tangsang na ka shnong Lumpyngngad.
Haba ïoh ban ïa kren bad ki katto katne ngut ki trai jaka, ki ong ka jingduh jong ki ia ki jaka rep na ki bor lynshop ki bor mariang ka long kumba duh ïa u dkhot ka longïing uba khlad syndet ne ïap bym dei por, namar ka jingsngewsih kaba khraw bad ka jongïam pait dohnud kaba ym lah shuh ban pyntngen ïa ki dohnud jong ki, ki ong ba ki im ja kpoh da kaba rep kwai, tympew, sohmarit, synsar, kait, sohtrun bad kiwei.
Ki sngew ba la kut ka lad ïa ki, ki ong ha ki por ba la dep ‘ngi pyndap pynbiang ïa ka ïing ka sem, bsa ïa ki khun ki kti, pynstad pyntip ïa ki da ka jingdon kine ki marrep ha kane ka jaka kaba long ka jingkyrkhu ïa ki, te mynta pat da ka jingpynjulor ki bor mariang da ka jingjur palat u lapbah lapsan,ka long ka jingduh kaba khraw bad ka la poi sha ka kut lad na ka bynta lashai lashisngi ka ïing ka sem bad ki khun ki kti’.
Kitei ki longïing kiba shah ktah bha na kane ka jingtwa khyndew bad baroh ki jingthung jingtep ki la duh lut ki long ka kong Embhah Shylla kong Damayanti Shylladong kong Akordor Lamare kong Miyo Tangsang.
Ki nongrep kiba im ja kpoh na kane ka jaka ba jia, ki ong ba kim ïoh lad shuh ban leh da kumwei, namar lada ki thung bujli da kiwei pat ki jingthung, ka khyndew kam long shuh, bad ki don ka jingkyrmen sa tang ban phai sha ki bor sorkar naduh u local MLA, myntri ba dei khmih ïa ka rep ka riang, SDO, BDO Amlarem ban ïarap ïa ki ban pynïoh skim ha kaba ïadei bad kane ka jingjia.
Ka jingtwa kane ka khyndew ka la ktah ruh wat ïa u surok PWD kaba la dap khyndew kaba pynsah kut ïa ka leit ka wan ki Kali ki motor.
Katba haka janmiet 18 tarik u Jylliew ha ka por 4:30 eiei la don ka JCB kaba la dang pynkhuid ïa ka khyndew na ka tei ka jaka khnang ba ki kali ki motor kin ïoh ban leit ban wan, la ong da kiba sakhi hangta ba lada u slap u dang bteng khlempep kan sa don biang ka jingtuid khyndew na ki bynta ba sha khlieh u surok, la ong ruh da kiba rep ha kane ka jaka ka jingjngai na surok PWD sha ka jaka ba twa khyndew ka long kumba 400 m ei ei.
