Mynta ka sngi ka Jaintia National Council (JNC), ka la pynlong ia ka prokram thung dieng ha Madam Mukhlot kaba hap hapoh eleka Sutnga, ki nongialam ba kynthup u President, u bah Sambormi Lyngdoh, u Art & Culture Secretary,u bah Mehi Rymbai, u Prisident JNC – Jalaphet Circle, u samla Andi Bareh, lem bad ki dkhot kila iashim bynta ban thung ia ki tynrai dieng ha ka jaka rep kaba heh bha kaba long trai da u bah Self Daniel Lyngdoh uba na ka shnong Sutnga, uba dei ruh uwei na ki nongrep soh bad nongri dohkha ba paw ha ka jylla Meghalaya. Ka jingthung dieng jong ka seng ka long shibynta ban pynneh pynsah ia ka mariang bad kumjuh ruh ban kyntiew shuh shuh ia kane ka jaka kaba itynnad kaba don ha Madam Mukhlot.
Na ka liang u bah Mehi Rymbai, u la ong ba u pynpaw ka jingsngewkmen, ban iohi ba kane ka jaka mynshwa ka dei ka jaka tih dewiong, ka jaka ba la syllen lut ki lum, hynrei hadien ba ka NGT ka khang ban tih dewiong u ma S.D. Lyngdoh u la shim da kawei pat ka synjam ban pynjyrngam biang ia kane ka jaka. U la kyrpad ia ka sorkar ban phai khmat lem sha kane ka thaiñ ha ba la iohi ba ha ki thaiñ Khasi bad Garo baroh ki nongrep ki ioh ia ki skim jingiarap ba T.50 lak haduh T.1klur ban kyntiew ia ki nongrep hynrei ha East Jaintia pat ym don kum kane ka lad jingiarap na ka sorkar.
La ong ruh ba kane ka dei ka jaka rep soh kaba heh tam ha ka jylla Meghalaya kaba don ka jingheh haduh 36 hecter, ka jaka ka dap da ki tynrai dieng soh bapher bapher, ki dieng khlaw kiba la don palat ia ka shi lak tylli ki tynrai dieng, don ruh ki jait dieng ba la wanrah na shabar ka ri kum na ka ri Malaysia bad ki don ruh bun tylli ki pung dohkha ha kane ka jaka. Kumta ka sorkar ka donkam ban phai khmat kum sha kane ka jaka ban kyntiew shuh shuh, bad kyntu ruh ia kiwei ki nongrep ba kin bud nuksa na une u rangbah, u ma Self Daniel Lyngdoh ban long kiba pahuh ha ka bam ka dih bad ruh ban wanrah ia ka lad iohkam iohjam.
Kum ban shu bynrap, kane ka jaka ri dohkha jong u ma Self Daniel Lyngdoh ka dei kaba ba don bun bha ki thliew dewiong, sngew tynnad ban tip ba ki thliew dewiong bym pyndonkam shuh mynta ki la kylla sha ki pung ri dohkha, ki jaka lum ne jaka khlaw kiba la syllen ki bym don shuh ki dieng, mynta ki la kup rong jyrngam ha kaba la pynjyrngam da ki dieng soh, ki dieng khlaw bad kane ka wanrah jingmyntoi ruh ha kaba kyntiew ia ka ioh ka kot bad wanrah ruh ia ki lad iohkam iohjam ia ki nongshong shnong ka thaiñ.
