Ka Jaiñtia Joint Alliance (JJA) hapoh ka jingïalam u Chairman ma Ombormi Tariang JYF bad u Secretary ma Everest Langstang WjSU, hynnin ka sngi 25 tarik da ka jingkhot sngewbha ka shnong kila leit hiar sha ka jaka ba kam beaiñ da ki briew ka Assam kaba dang hap haka shnong Lapangap, West Jaiñtia Hills District.
Na ka liang ka Jaiñtia Joint Alliance kala pynpaw bad ai ka jingïaroh halor ‘ka nongrim bad ka jingshlur jong ki briew bashong basah haki jaka khappud kila la ïeng skhem ban ïada ïala ka khyndew ka shyiap haduh kine ki sngi’.
Ha katei ka jingleit mih paidbah hynnin ka sngi kynthup naduh ki nongshong shnong bad ki dkhot sengbhalang kila leit ban pynpra syndon da kaba jynrat noh ïaki tynrai dieng bala dep thung bad ïa ka ïing trep kaba dang shna da ki lyngtang bad dieng sawdong da ki briew ka Karbi Anglong Assam.
Hashwa kane kala don ka jingïalang paidbah bala wan ïashim bynta naduh ki paidbah nongshong shnong ka thaiñ, ki pulit, ki bor synshar Distrik bad ki sengbhalang kiba la pyrshah jur ïa katei ka jingwan kam trai bad lehbor da ki paid Karbi hapoh ka shnong Lapangap.
Na ka liang ka JJA kala pynpaw ka jingsngewkhia halor ka jingbym shimkhia jong ka sorkar Meghalaya ban peit ïa kane ka jingeh jong ki paidbah bashong basah ha ki jaka khappud kaba wanrah ïa ka jingïa umsnam manla ka por.
Halor kane ka JJA ka kyntu jur ïaka sorkar jylla ban buh noh da ki pulit ha katei haka jaka ba ïakynad. La dawa ban buh ruh ïaka Police Out Post ne ka Camp kaba pura kumba leh ha ki jaka khappud ka Assam-Mizoram bad ka sorkar ka dei ban pynbna daka Polisi treikam kaba shai, kata ban ai jingïada ïa ki shnong khappud ban lait na ki jingma bad ki jingleh donbor.
Kum ka kynhun ka kyntu ïa ka sorkar ban kan shim noh mardor ïaka jingkitkhlieh, ban ai ka jingïada ba pura ïa ki briew trai jylla kiba im ha ki jaka khappud.
