Ka JBB&FA ka pynpaw ka jingiaroh bad ai khublei kyrpang ia u samla Raymond Nongkhlaw uba juh dei u Mr India ula mihkhmat ia ka ri India sha ka Mr Universe Championship kaba la pynlong ha nongbah Bangkok jong ka ri Thailand ha kane ka 16 tarik mynta u bnai.
Ha kane ka jingiakhun Mr Universe, u Raymond Nongkhlaw ula leh bha bad ula poi ha ka kyrdan kaba ar (Silver Medal) jong ka jingiakhun Men Bodybuilding Extremebody Category ka WFF PRO-AM Universe Championship 2022. Kane ka jinglah jong u Raymond kala wanrah burom ymtang ia ka jylla hynrei ia ka ri hi baroh kawei.
Kumta ka na ka liang jong ka seng JBB&FA ka kwah ban ai jingmut ia ka sorkar ba kum shi bynta ban nangkyntiew ia ki kam sports hapoh ka jylla kala dei ban ai kam sorkar lem ia une u samla namar ka jinglah jong u ban wanrah burom ia ka jylla bad ka ri India.
Sa shisien ka JBB&FA ka buh ka jingkyntu lyngba u Myntri Rangbah Conrad K Sangma bad u Myntri ka tnat ki kam ialehkai u bah Banteidor Lyngdoh ba kin iarap ban pynbha pynmiat shuh ia ka Sports hapoh kane ka jylla khnang ba kan long ka jingmyntoi ia ki khun samla baroh kiba don la ka sap ka phong kum ha kine ki kam Body Building bad ruh ha kiwei pat ki jait sports.