Ka Trained Nurses Association of India (TNAI), West Jaiñtia Hills mynta ka sngi 12 tarik u Jymmang, kala rakhe ïa ka sngi kyrpang jong ki nongtrei Nurse ne ka ‘Nurses Day’ haka jingïalang kaba la pynlong ha Northeast Adventist University, Khliehtyrshi halor ka phang “Our Nurses, Our Future: Caring for Nurses strengthen economies.”
Ha kane ka sngi la wan ban donlang naduh ka kong Darry Gretta Kharshiing, Chief Judicial Magistrate, u Dr. Heimonmi Niang, Block Development Officer, Thadlaskeiñ C&RD Block, kong Larista Dohling, Principal School of Nursing Pahamsyiem, Nongpoh bad General Secretary jong ka TNAI, Meghalaya State Branch.
Hashwa ban sdang ka Prokram la pynlong ïa ka jingthang ïaka sharak kaba long kum ka dak ka jingshai haka liang ka jingai jingshakri kaba bha tam jong ki nongtrei Nurse ha kylleng ki jaka sumar.
Na ka liang ka kong Darry Gretta Kharshïing kum ka kongsan haba ai jingkren kala ai jingïaroh ïa baroh ki nongtrei Nurse kiba la aiti met bad mynsiem ban ai jingsumar ïaki nongpang ha ka liang jong ka koit ka khiah jong ki hapoh ka imlang ka sahlang.
Kala kren kyndiat shaphang kane ka phang “Our Nurses, Our Future: Caring for Nurses Strenghten Economies” da kaba ong ka kamram jong ki Nurse ‘kam dei tang ha ka liang ka koit ka khiah, hynrei ki don ruh ka bynta kaba khraw eh ban kyntiew ïa ka ïoh ka kot’.
Ka kong Larista Dohling kala batia khyndiat shaphang ka rukom treikam jong ki Nurse katum ka juk ba mynta, da kaba ong ruh ba kinongtrei Nurse ki long kum ki rishot bah kiba kyrshan ïa ka koit ka khiah jong kiba bun balang.
Kiwei de kiba ai jingkren ki kynthup ïa ka kong Larista Dohling, u Dr. Heimonmi Niang, BDO Thadlaskeiñ, ka Suzy Lewis Chen, Vice Principal School of Nursing Dr. NTH, Jowai.
Na ka liang ka Nurses Association of India ha kane ka sngi kyrpang kala sam ruh ïa ki khusnam (mementos) sha kito ki nongtrei Nurse kiba la shong thait noh naka kam.
Ha kane ka prokram ïa ki kyntien pdiang la ai da kakong Bailinda Dkhar, Principal cum Associate Professor NEACON bad ïa ki kyntien ai khublei la ïoh na ka Lubih Kyndiah, Nursing Superintendent Jowai Civil Hospital, Ialong. Katba ïa ka jingïalang la pynïaid da ka Phiralynn Kharkongor, Assistant Professor NEACON.
