U Bah Donbok Dkhar, President ka Hynñiewtrep Integrated Territorial Organisation (HITO) ryngkat bad ki dkhot na Mawryngkneng Circle, hynne ka sngi ki la leit ban iakynduh ia u Bah Winston Tony Lyngdoh, Myntri ba khmih ia ka tnad Trade bad ia u Bah Shemborlang Rynjah CEM, KHADC ban iakren halor ka jinglum khajna be-aiñ bad ka jingklumar kaba mih hynnin ka sngi ha Mawryngkneng.
Lah ban pynkynmaw hangne, ba ka jingleit khynra jong ki dkhot ka HITO hynnin ka sngi ka 31 tarik Lber 2025 ha Mawryngkneng ka dei na ka jingioh lum jingtip ba don ki briew kiba kam ba ki dei na ka tnad Forest, ki lum pisa be-aiñ wat ia ki kali paidbah kiba kit rnga bad kit lyntang ban pyndonkam ialade khlem da ïit bniah la ki dei ne em ki kali ba kit ia ki mar khaïi lane ki mar rep.
Ha ka jingioh iakynduh ia u CEM, u Bah Donbok u la ai ia ka jingiaroh ba u Bah Shemborlang u la shimkhia mar mar hadien ba la ioh ia ka khubor ba don ka jinglum khajna be-aiñ ha Mawryngkneng, kata naduh hynnin ka sngi hi ba ioh ia ka jingtip halor katei ka khubor. U Bah Donbok u la ïaroh ruh ia u CEM ba u la pyntikna ba ia baroh ki khyrdop lum khajna ka tnad Forest, yn shimti hi noh da ka KHADC bad ia kane yn pyntreikam naduh mynta ka sngi ka 1 tarik Iaiong 2025.
U President ka HITO u la ong ruh ba ia kane ka mat, ka seng kan iai bud-dien bad tih ruh kham jylliew ioh kane ka kam ka dei na ka jingdon kti hi ki briew ka KHADC. “Ngin peit hato ka KHADC ka lah ne em ban teh lakam, ioh lehse ki dang don ki ‘langïong. Nga kyrmen ia kaba bha bad ha kajuh ka por nga ai ka jingiaroh ia u CEM ba shimti ia kane ka kam” ong u Bah Donbok.
Ka khubor ba kham sngewtynnad ba u CEM u la kular lyngba kane ka jingjia, ka long ba ym tang ki khyrdop jong ka tnad Forest hynrei baroh ki jaka lum khajna kiba hap hapoh u pud u sam jong ka KHADC kin ym aiti shuh ha ki riew shimet hynrei yn pyniaid hi da ka council.