U Myntri jong ka tnad Health and Family Welfare u James P.K Sangma mynta ka sngi ula plie pyrda ia ki lai tylli ki bynta ba kynthup ia ka Biological Management System, ka Geriatric Ward ba 10 jingthiah bad ka P.S.A. Oxygen Generation Plant ha Civil Hospital, Shillong.
Ia ka prokram la pynlong da ka ophis jong u Joint Director of Health Services bad ia jingialang la pynlong ha phyllaw jong ka Hospital.
Haba kren ha ka jingialang u James ula iaroh ia ka jingtreishitom jong ki Doctors, ki Nurses bad baroh ki nongtrei jong ka Civil Hospital halor ka jinglah jong ki ban pyniaid beit pyniaid ryntih ia ka Hospital wat hapdeng ki jingeh ba bun. U la ong ruh ba ka jinglah ban plie ia kine ki lai tylli ki bynta jong ka Civil Hospital ka pyni ia ka jingkiew shaphrang jong ka jylla ha ka liang ki kam jingsumar bad ula kyrmen ba ka sorkar kan lah ban pynioh ia kum kine ki bynta sha kiwei pat ki jaka sumar kiba don ha kylleng ka jylla.
Ha kane ka sngi la ioh ruh ka jingkren na ka liang jong u Sampath Kumar uba dei u Principal Secretary ka Heath and Family Welfare Department. U Kumar ula iaroh ia ka jinglah jong kane ka Hospital ban iakhun ia kane ka khlam Covid-19 da ka jingshimkhiah bad ka jingshakri hok jong ki nongtrei jong ka. U la ong ruh ba ka Cancer Wing jong kane ka Hospital mynta kala treikam bha bad da ka jingtreishitom jong ki nongtrei la khmih lynti ba ia ka Civil Hospital, Shillong yn sa lah ban pynkiew kyrdan noh sha ka Hospital kaba long kyrpang ban sumar ia kane ka jingpang ha ki snem ban wan. (MIPR)
