Ka jingïalang ai jinghikai hapoh ka jingïaid lynti jong ka Dharti Aaba Janjatiya Gram Utkarsh Abhiyaan (DAJGUA) la pynlong ha ophis jong ka Amlarem Block hapoh ka jingïarap jong ka Rashtriya Gram Swaraj Abhiyan (RGSA). Kane ka jingïalang kaba la pynïaid da ka State Rural Employment Society (SRES), ka long ban kyntiew ïa ki shnong jong ka Ri Khasi Jaiñtia khamtam ha ki bynta kiba don ha khappud, lyngba ka jingai jingtip halor ka jingïaleh na bynta ka rep khlaw kaba ryntih, ka jingïada ïa ka mariang, bad ki lad kamai kajih lyngba ki mar rep khlaw kiba lait na ka dieng.
U R. Pakma, Range Forest Officer (Soil Forestry), Amlarem Sub-Division, u la long u Nonghikai-(Resource Person) ba kongsan ha kane ka prokram. U la pynshai bniah halor ka jingdon bynta jong ki shnong, ki kur bad ki Dorbar Shnong ha ka jingïada bad ka jingseng pyrkhat ban pynneh pynsah ïa ka khlaw, kaba bun na ka jaka jong ka Meghalaya, tang 5.10% ka hap ha ka tnad Forest jong ka sorkar jylla, katba ka bynta kaba sah ka long ka ba dei jong ki paidbah. U la batai ruh shaphang ki jait khlaw, ka jingïoh bynta ha ka Community Reserve bad ka jingdonkam ban thaw ïa ki Biodiversity Management Committees (BMCs) hapoh ka aiñ Biological Diversity Act, 2002.
Palat 60 ngut ki nongwan shim bynta na ki shnong kum ka Mupyut, Darang, Nongtalang, Dawki, Syndai, Sohkha bad kiwei pat ki la wan ban ïashim bynta ha kane ka jingïalang. La hikai ha ki phang bapher bapher kum ka jingïaid lynti ban seng ïa ka Village Forest Plan, ka jingïarap na ka bynta ka mapping bad resource assessment, ki lad jingpynmih kam kum ka afforestation bad ka jingïakhun pyrshah ïa ka jingshah pynjot ka mariang. La ai ruh ka jingïarap ban pynioh kamai kajih da kaba pyndonkam hok ïa ki mar rep khlaw (NTFP) kum ka siej, ki jingbam ba mih na khlaw, ki jhur bad kiwei. La hikai ruh shaphang ka jingpynbha ïa ki mar, ka jingpynneh ïa ka jingstad, ka jingpynshlur ïa ka e-commerce bad ka plie lynti sha ki iew ba pher.
Kane ka prokram ka la pynshai ba ka jingïai don bynta jong ki shnong ka long kaba donkam bha na ka bynta ban pynneh ïa ka mariang, pynneh ïa ki lad kamai bad ban ai ka jingïarap khamtam ha ka rukom long trai shnong. Ka jingïalang kan bteng biang ha ka 31 tarik u Nailur bad 5 tarik u Nailar 2025.
