Da ka jingthmu ban wanrah ia ka jingpynsngewthuh paidbah halor ka jingpynduh jait noh ia ka jingpang TB ha shityllup pyrthei, mynta ka sngi 19.03.2025 ka ophis District Tuberculosis Centre, Jaintia Hills kala rakhe ia ka World TB Day, 2025 ha Rymbai Government Secondary School, Rymbai, East Jaintia Hills District.
Ha kane ka prokram la wan ba iadon ryngkat da u Nodal Officer, National Tuberculosis Elimination Programme (NTEP), East Jaintia Hills District, Dr L. Marbaniang, u Medical and Health Officer, Rymbai PHC, Dr Lambapher Kharnaior, Senior Malaria Inspector (SMI), East Jaintia Hills District, ma Embhahmi Nongjngi, Senior Tuberculosis Laboratory Supervisor (STLS), ma Watson Siangshai, kiwei de ki nongtrei jong ka health, ki nonghikai bad ki khynnah skul.
Haba ai jingkren ha kane ka sngi u Dr. L. Marbaniang ula pynshai ia ki khynnah skul shaphang ka jingdonkam ba ai ka jingpynsngewthuh paidbah halor ka jingktah jong ka jingpang TB ha ka met jong u briew, kumjuh ula iathuh halor ka jingktah jong ka jingpang Malaria bad ki dak ki shin jong kane ka jingpang. U la batai ruh halor ki lad ki lynti ban leh hala ïing la sem ban iada na ki jingpang TB bad Malaria.
Kiwei de kiba la ai jingkren ha kane ka prokram ki kynthup ia u Dr. Lambapher Kharnaior, uba la ai ka jingkyntu kaba jur ia ki nongpang TB ba ki dei ban dih tista bad pyndep ia ka course jong ki dawai kaba 6 bnai. U ma Watson Siangshai uba la batai shaphang ki 9 tylli ki dak ki shin jong ka jingpang TB bad pyntip ruh shaphang ki lad jingiarap pisa kiba ka sorkar ka ju ai sha ki nongpang TB.
Ha shwa ban pynkut ia kane ka prokram ka la don ka jingshim jingkular da ki nongtrei ka tnad ka koit ka khia, ki nonghikai bad ki khynnah skul kaba la lam khmat da u ma Watson Siangshai na ka bynta ban buh jingmut ban pynduh pyndam ia ka jingpang TB. Ka la don ruh ka jingiaphylliew jingmut hapdeng ki khynnah skul bad ki nongtrei jong ka tnad ka koit ka khiah ba dei peit ia ka jingpang TB bad Malaria.
